OÉ-CUSSE, 05 outubru 2023 (TATOLI – Autoridade Rejiaun Administrativa Espesiál Oé-Cusse Ambeno (RAEOA) liuhosi Sekretáriu Rejionál ba Asuntu Komérsiu no Indústria, hamutuk ho delegasaun hala’o enkontru koordenasaun servisu ho Diretora Ezekutiva Interina Servisu Rejistrasaun no Verifikasaun Emprezariál, Institutu Públiku (SERVE.IP), Ana Jeanrie Cortereal iha edifísiu SERVE.IP, Hudi-Laran, Dili, kuarta ne’e.
Notísia relevante: SERVE prosesa ona kioske 46 hosi Pássabe-Nítibe atu hetan lisensiamentu komersiál
Komunikadu imprensa ne’ebé Agência Tatoli asesu, katak objetivu hosi enkontru koordenasaun, ne’e Sekretáriu Rejionál ba Asuntu Komérsiu no Indústria , reprezenta Autoridade RAEOA hodi ko’alia kona-bá alterasaun akordu Memorandu Entendimentu (MoU) entre SERVE.IP ho RAEOA ne’ebé selebra ona iha 2017.
Nune’e presiza halo alterasaun hodi loke dalan entre parte rua atu hametin liña koordenasaun iha atividade lisensiamentu komersiál iha Oé-Cusse Ambeno.
“Ami mai iha-ne’e, atu ita haree lisuk hodi halo alterasaun ba MoU entre RAEOA ho SERVE.IP ne’ebé estabelese ona iha tinan 2017,” Sekretáriu Rejional Asunru Komérsiu Indústria, Pedro da Cunha akresenta.
Nia subliña, alterasaun ne’e atu haree klauzula balun ne’ebé la kontestuál ona ho nesesidade, entaun parte rua presiza altera hodi hala’o servisu administrativu ho efikasia no efisiénsia.
Tan ne’e, parte RAEOA apresia ho prezensa SERVE.IP iha Oé-Cusse, tanba fasilita ona komunidade iha atividade lisensa registu komersiál inklui atividade seluk tan.
Diretora Ezekutiva Interina, SERVE.IP, Ana Jeanrie Cortereal, afirma, parte SERVE prepara ona proposta alterasaun, no promete iha tempu badak parte rua bele halo ona ajustamentu ba akordu ne’e.
“Ami parte SERVE.IP aseita ho proposta Autoridade RAEOA hodi halo alterasaun ba akordu ne’ebe estabelese ona iha tinan 2017, nune’e bele iha liña koordenasaun servisu administrativu di’akliu tan. SERVE.IP prontu no ami prepara ona proposta alterasaun hodi nune’e iha tempu badak parte rua bele halo ajustamentu ba MoU entre RAEOA ho SERVE.IP,” nia katak.
Nia dehan, liuhosi alterasaun akordu ne’e, hein katak sei bele Autoridade RAEOA bele atribui hela fatin, nune’e SERVE.IP bele hala’o servisu atendimentu públiku ba atividade lisensiamentu komersiál ba iha komunidade Oé-Cusse ho di’ak.
Notísia relevante: Komérsiu Indústria RAEOA deteta kioske 255 seidauk iha lisensa negósiu
Jornalista: Abílio Elo Nini
Editór: Evaristo Soares Martins
