OEKUSI, 01 Abríl 2025 (TATOLI) – Ekipa husi Autoridade Inspesaun no Fiskalizasaun Atividade Ekonómiku Sanitária Alimentár, Institutu Públiku (AIFAESA,I.P), tersa ne’e, taka tan loja Xineza ida ho naran Qui Haung G. Shop iha Terminál Tono, suku Cunha, sub-rejiaun Pante Makasar Rejiaun Administrativa Espesiál Oekusi Ambeno (RAEOA) tanba loja referida fa’an produtu balun liu prazu no falta ijiene.
“Razaun taka loja referida tanba tanba falta ijiene hanesan kondisaun sasán sira misturadu, alimentár no la’os alimentár kahur hamutuk de’it iha fatin ida, laiha kondisaun, tanba balun tau de’it iha rai inklui kontinua faan sasan kaduka (liu prazu)”, Diretora Operasionál AIFAESA,I.P, Claudina Soares Pinto, hatete hafoin fiskalizasaun ba loja sira iha RAEOA, tersa ne’e.
Notísia relevante:AIFAESA taka provizóriu loja Xineza rua iha Oekusi tanba komete irregularidade
Ho situasaun ne’e, AIFAESA fó ordén hodi suspende ka taka provizóriu atividade negósiu durante loron 30, liuliu bandu atu labele faan, maibé presiza halo separasaun entre produtu sira.
“Ita deteta falta ijiene tanba iha produtu balun estagadu ka danifikadu no mós produtu balun liu prazu, entaun ita enseramentu (taka) provizóriu dentru loron-30 nia laran, depois na’in ba estabelesimentu ne’e hadi’a nia kondisaun sira-ne’ebé ita rekomendasaun bainhira kumpre ona bele informa fali ba AIFAESA atu halo re-inspesaun atu loke fila-fali hodi kontinua faan fali hanesan baibain,” nia afirma.
Bainhira loja na’in la kumpre rekomendasaun ne’ebé ekipa AIFAESA fó sai mak sei aplika sansaun multa adminitrativa hahú husi $250 to’o rihun $75.
“Ida-ne’e hanesan sansaun assesória ne’ebé ita foti taka provizóriu maibé la kumpre ba iha irregularidade liu prazu danifikadu sei kontinua prosesu administrativa, nune’e sei iha koima ne’ebé aplika. Ekipa sei halo relatóriu ba inspetóra jerál, nune’e hatuun despaixu ba parte jurídiku hodi aplika koima ba iha estabelesimentu referida, hahú husi $250,00 to’o rihun $75,00, entaun orsida parte jurídiku sei tetu ba iha infrasaun ne’ebé komete,” nia hateten.
Notísia relevante:Loja xineza mak komete liu infrasaun iha Oé-Cusse – AIFAESA
Ifa fatin hanesan, loja na’in Qin Haung Lei Qui, rekoñese katak iha produtu balun liu prazu no falta ijiene, nune’e nia promete sei koopera hodi hadi’a durante fulan-ida nia laran.
“Di’ak ha’u kumpre, hanesan sasán sira hanesan triplex ha’u hadi’a hotu iha fulan-ida nia laran, ha’u bele loke fali atu faan,” nia responde ba rekomendasaun ne’ebé splika husi AIFAESA.
Autoridade Inspesaun no Fiskalizasaun Atividade Ekonómiku Sanitária Alimentár, Institutu Públiku (AIFAESA,I.P), hala’o inspesaun iha Oekusi durante loron-rua hahú iha segunda to’o loron tersa konsege taka ona loja Xineza tolu tanba komete irregularidade hanesan faan sasan liu prazu, loja faan sasan ho armazein ladun ijiene inklui dokumentu balun mate.
Notísia relevante:AIFAESA divulga instrumentu legál kona-ba regula atividade ekonómika iha Oé-Cusse
Jornalista: Abílio Elo Nini
Editór: Florencio Miranda Ximenes
