Atleta portugés husi modalidade basketból no atletizmu vizita Eskola ESJ 12 Novembru
DILI, 24 Jullu 2025 (TATOLI)—Atleta portugés husi modalidade basketból no atletizmu ne’ebé kompete iha Jogu Desportivu Komunidade País Lian Portugés (CPLP, sigla portugés) ba dala-XII, Kinta ne’e, halo vizita bá Eskola Ensinu Sekundáriu Jerál (ESJ) 12 Novembru, Bekora ho objetivu prinsipál atu hametin lasu amizade no haree besik realidade edukasaun iha Timor-Leste.
“Objetivu husi sira-nia vizita ne’e mak atu hametin no buka hatene oituan kona-ba realidade edukasaun iha Timor-Leste. Tanba ne’e, sira husu ami atu mai iha ne’e, nomós jogadór sira halo interrasaun ho estudante sira,” Reprezentante delegasaun husi Portugál, Arnaldo da Rosa, informa ba jornalista sira, iha resintu Eskola ESJ 12 Novembru, Bekora.
Nia dehan, vizita ne’e atu aproveita aprende kona-ba realidade foun sira iha eskola.
“Ita hatene oituan de’it kona-ba realidade no buat ida de’it ne’ebé ami bele fahe maka eskola hanesan buat ne’ebé importante iha estudante sira-nia moris,” nia akresenta.
Notísia relevante : Portugál lidera saltu dook iha modalidade atletismu
Arnaldo da Rosa, nota katak povu Timor-Leste amigável no iha komunikasaun di’ak tebes, ne’ebé atleta sira konsidera hanesan esperiénsia inkredível tebes.
“Ami maka mai vizita sira, maibé sira simu ami ho di’ak tebes, no gosta halo kooperasaun ho estudante sira,” nia katak.
Fahe esperiénsia desportu
Iha fatin hanesan, Diretór Eskola ESJ 12 Novembru Bekora, Marcelino Menezes Magno, hateten, vizita ne’e atu fahe esperiénsia ba malu kona-ba área desportu.
“Atividade ne’e nia objetivu atu partilla liután ita-nia kultura no ita-nia joven sira ne’ebé talentu iha área desportu, tanba ita ko’alia kona-ba área desportu nasaun CPLP sira-nia nível desportu ne’e a’as,” nia katak.
Diretór ne’e hameno ba joven sira atu aproveita oportunidade sira hanesan ne’e atubele hetan abilidade di’ak no kualidade nune’e iha futuru bele lori desportu Timor nian bá mundu internasionál.
Nune’e mós, Diretór Nasionál Ensinu Sekundária Jerál husi Ministériu Edukasaun (ME), Benjamin Fernandes, hato’o katak atleta sira husi Portugál foti tempu atu halo vizita bá eskola sira iha Dili laran.
“Vizita ne’e hanesan vizita amizade entre Estadu CPLP, liuliu Portugál ho ita, tanba sira hakarak haree besik liután kondisaun reál eskola sekundáriu jerál Timor nian,” Benjamin hatutan.
Hafoin halo vizita ne’e, bainhira atleta sira fila bá sira-nia rain, sira bele iha hanoin ruma ba futuru atubele halo kooperasaun iha parte desportu nian.
“Ho sira-nia prezensa bele motiva estudante timoroan sira, liuliu iha área desportu. Tanba ne’e mak ministériu hakarak lori jogadór Portugál sira mai iha eskola ida-ne’e” nia tenik.
Jornalista : Osória Marques
Editora : Julia Chatarina
