OEKUSI, 24 Jullu 2025 (TATOLI) – Autoridade Rejiaun Administrativa Espesiál Oekusi Ambeno (RAEOA), liuhusi Sekretária Rejionál ba Asuntu Agrikultura, hatuur fatuk inan hodi konstrui kanál irrigasaun metru-100 ho kustu rihun $26 hodi fasilita natar ektare 31 iha natar Betbanae suku Lalisuk sub-rejiaun Pante Makasar.
Notísia relevante: Autoridade Lalisuk husu konstrui irigasaun haat hodi hasa’e produsaun
Sekretária Rejionál ba Asuntu Agrikultura, Filomena Sila, informa, projetu ne’e, halo ona avaliasaun liuhusi konkursu públiku, ne’ebé antes ne’e hetan pedidu husi natar na’in-sira, tanba kada tinan infrenta problema kona-ba kanál irigasaun.
“Ohin ita halo lansamentu atu kompañia bele hahú ona serbisu, tanba konstrusaun ne’e tenke finaliza antes fulan-Novembru 2025, tanba molok udan monu rai, agrikultór sira atu hahú ona halai natar, no mós taka ona orsamentu tinan ne’e nian, nune’e kompañia tenke aselera atu hetan nia pagamentu antes fulan-Dezembru,” nia ko’alia iha natar Betbana’e, suku Lalisuk.
Tanba ne’e, nia rekomenda ba natar na’in-sira atu koopera ho empreza hodi halais konstrusaun, no fó hanoin mós empreza konstrutora sira, atu aselera projetu no garante kualidade, tanba gasta orsamentu Estadu tenke fó benefísia direta agrikultór ba tinan barak nian.
Iha fatin hanesan, Xefe Suku Lalisuk, Hermenegildo Lalisuk, agradese Governu tanba pedidu ne’ebé tinan kotuk autoridade lokál sira submete konsege responde iha Orsamentu Jerál Estadu (OJE) 2025 ne’e.
Dezenvolvimentu ne’e importante, obra ne’e la’ós ba xefe suku maibé ba komunidade sira, sei ita ko’alia haree presiza iha irrigasaun depois mak hadi’a bee iha barrajen Tono, ne’ebé ha’u-nia natar na’in-sira ne’ebé hetan irrigasaun ne’e, agradese tebes ba Governu, tanba antes ne’e ha’u rasik simu sira-nia preokupasaun hodi hatama pedidu ba agrikultura, ikusmai responde duni, tanba iha suku Lalisuk ami hetan projetu ba irrigasaun lima,” nia orgullu.
Notísia relevante:http://agrikultura-oe-cusse-planeia-konstrui-no-reabilita-irrigasaun-25/
Entretantu, konstrusaun atu harii irrigasaun ne’e, implementa husi empreza lokál Nuneo Unipesoál Lda ho valór kontratu rihun $26,080.82 ho durasaaun serbisu fulan haat, hahú husi fulan-Agostu tenki termina iha fulan-Novembru 2025.
Jornalista: Abílio Elo Nini
Editór: Rafael Ximenes de A. Belo
