OEKUSI, 17 Juñu (TATOLI) – Xefe Suku Lalisuk, Hermenegildo Lalisuk, husu ba Autoridade Rejiaun Administrativa Espesiál Oekusi Ambeno (RAEOA) liuliu servisu agrikultura, atu konstrui irigasaun haat ba natar sira iha suku Lalisuk, nune’e bele apoia hodi hasa’e tan produsaun hare membramo.
Notísia relevante:Agrikultura Oé-Cusse planeia konstrui no reabilita irrigasaun 25
Autoridade komunitária ne’e hato’o nia preokupasaun tanba natar iha fatin haat, hanesan iha área Tetumnanu, Panite, Masin-Ana no Masin-Naek, tinan barak ona abanndonadu tanba impaktu bee laiha.
“Sekretária Rejionál Agrikultura, kona-ba irigasaun haat, ne’ebé mak suku Lalisuk atu hetan, maibé to’o agora seidauk halo tenderizasaun, ne’ebé ami hein hela, ha’u relata ba Prezidente Autoridade katak orsamentu iha ona, ne’ebé primeiru ezekutasaun ne’e tenkde lais, tanba komunidade hein hela tanba atu hasa’e produsaun hare membramo, entaun presiza irigasaun, depois mak ko’alia ba hare, tanba ko’alia ba natar, ko’alia mós ba bee, entaun irigasaun tenke iha tanba natar sira-ne’e abandona,” infroma xefe suku Lalisuk, iha Oekusi, foin lalais ne’e.
Notísia relevante:Agrikultura Oekusi kolleta hare membramo ektare 24 iha Pante Makasar
Hata’an ba rekomendasaun ne’e, Prezidente Autoridade RAEOA, Rogério Tiago Lobato, konsidera importante atu fó solusaun tanba iha suku balun konsege rezolve ona.
“Ohin Xefe Suku Lalisuk, dehan bee laiha ne’e klaru, maibé foin dadaun ami konvida Prezidente Repúblika, mai ko’a hare ektare 51 iha suku Lifau, ne’e tanba ami hadi’a hotu kanál irigasaun sira balun iha suku Cunha mós rezolve ona, ne’ebé ha’u la promete, ita sei rezolve mós Lalisuk nian tanba osan iha ona, depois sei hadi’a mós irigasaun Tono, atu hasai rai henek ne’ebé nakonu iha irigasaun ne’e,” nia informa.
Entretantu, iha proposta Orsamentu Jerál Estadu (OJE) 2026 aloka orsamentu ba kategoria kapitál no dezenvolvimentu hamutuk $13,032.195 ka okupa 49.78% ho obejtivu atu finansia ba projetu multianuál hamutuk rua projetu foun 39.
Notísia relevante:Agrikultura RAOEA fasilita tratór unidade haat bá fila-rai iha natar Nunuheno
Jornalista: Abílio Elo Nini
Editór: Florencio Miranda Ximenes
