Julgamentu movel iha tribunál Oekusi la funsiona
DILI, 24 Jullu 2025 (TATOLI)-Juis Administradór Tribunál Primeira Instánsia Oekusi, Evangelino Belo, hateten julgamentu movel iha Oekusi la funsiona desde 2019 to’o agora, tanba juis ema na’in-rua de’it.
“Juis la to’o, juis ami na’in-rua deit entaun labele realiza julgamentu movel”, Evangelino Belo hatete ba jornalista sira iha Tribunál Primeira Instansia Dili, kinta-ne’e.
Juis Evangelino hato’o ona preokupasaun ne’e ba Konsellu Superiór Majistrarura Judisiária, espera konsellu bele foti desizaun atu koloka juis balun ba tribunál Oekusi, nune’e bele oferese justisa ne’ebé di’ak ba povu no lori-justisa besik povu, tanba funsaun juis mak administra justisa ho di’ak.
Nia espera kandidatu juis nain-13 ne’ebé agora daudaun iha-ne’e, konsellu bele konsidera preokupasaun ne’e hodi reforsa tribunál iha Oekusi, nune’e bele reativa fali julgamentu movel.
“Ami espera katak ho sira nain-13 ne’ebe foin fila hosi Portugal, karik sira integra ona iha tribunál, ida-ne’e bele ajuda ami iha ne’eba hodi haforsa servisu liga ho julgamentu movel no julgamentu koletivu. Ami presiza, tanba tribunál Oekusi ne’e kobre rejiaun-ida”, nia afirma.
Juis Administradór hatutan prosesu julgamentu iha Oekusi la’ o hanesan baibain, soke ba julgamentu koletivu ladun la’o normal, fulan-ida dala-ida de’it, tanba menus juis.
“Julgamentu koletivu iha tribunál Oekusi atu realiza tenke hetan apoiu juis-ida husi Tribunál Judisiál Primeira Instánsia Dili para reforsa, se lae julgamentu la la’o”.
“Kuandu iha julgamentu ba kolletivu entaun ami komunika mai Tribunál Dili hodi apoia juis ida tan para priense kolletivu ba julgamentu iha Tribunál Oekusi”, nia informa.
Ho situasaun ne’e, nia dehan afeta ba servisu tribunál Oekusi no aumenta númeru kazu pendente. Númeru kazu iha tribunál Oekusi ba kazu krime hamutuk 326, enkuantu prosesu sivil hamutuk 126.
Nia fundamentu iha tribunál Oekusi rejistu krime ne’ebe mak a’as liu mak kontra bandu no violénsia doméstika, abuzu sexuál no kazu seluk tán.
Notísia relevante: Julgamentu movel iha Dili-Aileu-Likisa-Ermera kontinua la’o normál
Jornalista : Natalino Costa
Editora : Rita Almeida
