DILI, 24 Jullu 2025 (TATOLI)-Atleta timoroan Maricha Juditha Fátima Mota no portugeza Leonar da Silva Gonçalves, hakat bá finál modalidade Karaté-do femeninu kategória kilógrama (kg) 53.
Maricha Juditha avansa bá finál hafoin hetan vitória dala-rua kontra Angola (2-0), Portugál (6-1) no Kabuverde la marka prezensa.
Iha sorin seluk, Leonar da Silva halakon nia adversária Kabuverde (10-1), Angola (2-6), Timor-Leste (6-1).
“Ha’u, kontente tebes tanba reprezenta nasaun nia naran”, Maricha Juditha hateten ba Tatoli iha Jinájiu Dili, ohin.
Atleta husi illa krokodilu ne’e prontu enfrenta nasaun jigante Portugál iha finál kompetisaun 53kg ne’e. “Kampu laran mak determina lakon ka manán’’, nia espresa ho orgullu.
Iha parte seluk, atleta Leonar da Silva Gonçalves, satisfeitu ho rezultadu referidu no sei hadi’ak liután tékniku, tátiku iha finál kompetisaun. “Iha finál, sei hasoru malu nafatin ho Timor-Leste. Ha’u fiar manán iha finál”, nia otimista.
Iha modalidade Karaté-do femenina kategória pezu 53kg ne’e partisipa husi atleta Leonar da Silva Gonçalves (Portugál), Rania Sofia Livramento Rodrigues (Kabuverde), Nária Isabel Afonso de Freitas Soares (Angola) no Maricha Juditha F. Fátima Mota (Timor-Leste).
Notísia relevante: Timor-Leste no Angola sei hadau medalla osan-mean iha Karate-do 55kg
Jornalista: Nelson de Sousa
Editora: Maria Auxiliadora
