DILI, 24 Jullu 2025 (TATOLI) – Atleta Alexandre Leonel de J. Nessi husi Timor-Leste no Jesus Milambo António Muanza husi Angola sei kompete malu iha finál modalidade Karaté-do, iha kategoria 55kg.
Alexandre garante ba finál Karaté-do tanba halakon nia aversáriu Mosambike (4-0) no Saun Tomé no Prinsípe (7-0). Entretantu, reprezentante angolanu Jesus Milambo manán Kabuverde (8-0) no Portugál (9-5).
“Ohin, sente kontente tebes tanba manán hodi hakat ba finál no sei hasoru Angola’’, Alexandre Leonel hateten ba Tatoli hafoin ramata jogu iha Jináziu Dili, ohin.
Atleta timoroan ne’e afirma katak sei kontinua esforsa atu sai kampeaun iha finál kompetisaun ne’ebé sei realiza iha 25 Jullu ne’e.
Aleinde ne’e, Sekretáriu-Jerál Karaté husi Angola, Ernesto Miguel Domingos, fiar katak Angola sei hetan medalla osan-mean ba país.
Iha kategoria maskulina 55kg ne’e partisipa husi atleta:
- Alexandre Leonel De J. Nessi (Timor-Leste),
- Kevin Miguel Ferreira de Sousa Silva (Mosambike),
- Anderley Monteiro de Ceita da Graça do Espírito Santo (Saun Tomé no Prínsipe),
- Jesus Milambo António Muanza (Angola),
- Herson Silva Dias (Kabuverde),
- Afonso Alexandre de Bessa Ferreira (Portugál)
Iha kompetisaun husi modalidade ne’e, Timor-Leste no Angola mak hetan pontu barak liu hodi hakat ba finál.
Notísia relevante: Karate-do femeninu 48kg: Timor-Leste no Portugál tama ba finál
Jornalista: Nelson de Sousa
Editora: Maria Auxiliadora
