DILI, 24 Jullu 2025 (TATOLI) – Atleta timoroan Melicia Auxiliadora Gusmão no portugeza Ema Pinéu Lopes Fernandes hakat bá finál modalidade Karaté-do, kategoria kilógrama (kg) 48, iha Jogu Desportu Komunidade Nasaun Lian Portugés (CPLP-sigla portugeza) ba da- XII 2025, ne’ebé hala’o iha Dili.
Atleta Melicia avansa bá finál hafoin manán dala-tolu no empata dala-ida, halakon nia adversáriu Angola (9-4), Kabuverde (7-0), Mosambike 7-0 no empata ho Portugál (1-1).
Iha sorin seluk, Ema Fernandes mós hatudu dezempeñu di’ak tanba manán Mosambike (8-0), Angola (10-4) no empata ho Timor-Leste (1-1), no la hasoru Kabuverde tanba la marka prezensa.
Iha jogu modalidade Karaté-do tuir sistema ida ne’ebé nia durasaun minutu rua ba kada kompetisaun.
“Rezultadu ohin, ha’u esforsu duni, tanba iha kampeonatu balun [TL nian] iha modalidade barak mak lakon tiha ona. Agora, tenke esforsu duni, aban tama ba finál no hasoru Portugál’’, Melícia Auxiliadora hateten ba Tatoli iha Jináziu Dili
Nia agradese ba apoiu no orasaun husi adeptu hotu no hatudu nia konfiansa katak bele konkista medalla osan-mean ida ba Timor-Leste. “Lori nasaun [nia naran], aban tenke kontinua esforsu”, nia otimista.
Treinadór Karaté-do husi Portugál, Nuno Morreira, espresa nia satisfasaun ho dezempeñu husi nia atleta no fiar katak hetan vitória, tanba atleta sira iha kualidade aas, preparadu ein termu tékniku no mentál.
Iha kategoria Karaté-do femenina 48kg ne’e, atleta husi nasaun lima mak partisipa mak hanesan:
- Timor-Leste: Melicia Auxiliadora Gusmão
- Portugál: ma Pinéu Lopes Fernandes
- Mosambike: Jordina Jordão Américo
- Angola: Emília Fernando Paulino Vela
- Kabuverde: Melissa Mendes Miranda
Notísia relevante: Treinadór Karate-do nasionál enkoraja atleta labele rende iha dalan klaran
Jornalista: Nelson de Sousa
Editora: Maria Auxiliadora
