DILI, 23 Jullu 2025 (TATOLI) – Treinadór modalidade Karaté-do nasionál, Andreas da Silva Ailerbito Quef, motiva atleta timoroan sira atu labele rende iha batalla, tanba reprezenta nasaun iha Jogu Komunidade País Ko’alia Lian Portugés (CPLP) hanesan naha todan ida.
“Ema hotu hatene imi-nia esforsu, maibé reprezenta nasaun ne’e buat todan ida. Labele rende iha dalan klaran. Joga de’it, iha kampu laran mak determina”, nia hato’o.
Atleta Timor-Leste na’in-haat mak sei kompete iha modalidade Karaté-do – Melicia Auxiliadora da Silva Gusmão iha kategoria pezu kilógrama (kg) -48, Maricha Juditha F. Fatima Mota ba kategoria pezu -53 kg. Ba ekipa mane, Alexandre Leonel Nessi ba kategoria -55kg no Eugénio da C. Wondeng Soares ba pezu -60 kg.
Treinadór timoroan ne’e hateten preparasaun atleta ein termu fíziku no tátiku hahú kedan iha Janeiru, maibé treinu intensivu iha fulan neen ikus hodi tama prá-kompetisaun, no prosesu sira liuhusi selesaun, nune’e agora hein tun ba kampu.
“Treindadór sempre tau esperansa ba atleta, maibé depende ba atleta nia esforsu. Tanba nia mak tun iha kampu, maibé iha esperansa ba atleta sira ne’ebé durante treinu hakarak mak liu”, nia otimista.
Notísia relevante: Karate-do Timor-Leste preparadu no sei hatudu rezultadu di’ak
Jornalista: Nelson de Sousa
Editora: Maria Auxiliadora
