VIKEKE, 24 Jullu 2025 (TATOLI)—Diretór Servisu Ministériu Obra Públika Munisípiu Vikeke, Casildo Gomes informa tékniku husi Ministériu Obra Públika (MOP) finaliza ona estudu ba mota Welolo atu harii hikas Ponte Welolo, lokalizadu iha Suku Luka, Postu Vikeke Vila, Munisípiu Vikeke.
“Kona-ba ponte Welolo foin lalais iha 19 fulan-Jullu ne’e ha’u aprezenta ona ba Ministru Obra Públika (MOP), Samuel Marçal, ne’ebé nia responde katak prosesu estudu ba mota Welolo nian ramata ona no sei loke konkursu iha tinan oin (2026),” Casildo Gomes ba TATOLI iha ninia kna’ar fatin, Beloi, Kinta ne’e.
Notísia relevante: https://tatoli.tl/2025/07/04/komunidade-luka-husu-mop-konstrui-ponte-uelolo/
Aleinde ne’e, nia dehan, nia mós aprezenta ponte Sumaku ne’ebé lokalizadu iha Suku Uma Tolu, Postu Lakluta ne’ebé kotu beibeik, ponte ida Baria-Laran, Suku Karaubalu ne’ebé kotu inklui ponte Beaço ba Ministru Obra Públika.
“Ha’u mós prezenta ponte Sumaku no ponte Baria-Laran ba ministru hodi tau-atensaun tanba ponte rua kotu sempre difikulta komunidade nia movimentu. Enkuantu, ponte Beaço ne’e ninia prosesu finaliza ona hamutuk ho estrada husi Uatukarbau mai Vikeke Vila ne’ebé sei implementa iha tinan oin,” Casildo haktuir.
Jornalista: Vitorino Lopez da Costa
Editór: Xisto Freitas da Piedade
