DILI, 25 Jullu 2025 (TATOLI) – Iha finál torneiu internasionál voleiból praia maskulinu entre Timor-Leste no Mosambike, halo ambiente iha kampu Lesidere ho lian hakilar husi adeptu sira no son husi múzika “Timór Ha’u Hadomi Ó” husi Cinco de Oriente, lori sentidu unidade no orgullu ba ema hotu.
Iha jogu ba hadau klasifikasaun datoluk ne’ebé termina ho vitória ba Timor-Leste (TL), adeptu sira la poupa enerjia atu apoia ho maka’as ekipa vólei nasionál. Kada pontu ne’ebé marka sempre selebra ho hakilar, dansa no basa-liman, liuliu son múzika husi Cinco de Oriente ne’ebé siboliza uniaun.
Liuliu, bainhira Timor-Leste manán set dahuluk no iha tempu rekreiu ne’e, de repente múzika Timor…ha’u hadomi ó..Hadomi domi domi ha’u hadomi ó lian, adeptu sira ne’ebé konsentra iha Lesidere ne’e hotu-hotu hananu ba vitória ne’ebé atleta timoroan sira hetan.
Hafoin jogu konklui ho vitória ba Timor-Leste, kampu iha praia Lesidere aumenta rame liután. Momentu ne’e markante tebes, tanba foin ba dahuluk Timor-Leste kompete iha Jogu Deportovu CPLP, maibé hetan medalla osan-metan. Nune’e muzika “Timór Ha’u Hadomi O” komesa toka, lori adeptu no jogadór sira ba emosaun. Ema hotu ne’ebé prezente – iha laran no li’ur kampu nian – hahú kanta, dansa no hakilar no hakuak malu, kria ambiente ida festivu no nakonu ho espíritu nasionalizmu.
Selebrasaun vitória
Iha momentu ne’e, kampu voleiból praia transforma hanesan festa ida bainhira jogadór Felisberto Bento Faria da Silva (16) hamutuk ho timoroan sira seluk dahur ho múzika Cinco de Oriente ne’e, hodi selebra vitória. Interasaun espontánea entre atleta sira no jogadór sai alegria ida iha tempu ida-ne’e.
Ba adepta Emelita Freitas, asiste jogu direta ne’e hodi fó motivasaun ba atleta no orgullu ida ba nia. Satán ho jogu termina toka ho múzika Timor Ha’u Hadomi Ó ne’e hatudu espíritu nasionalizmu. “Múzika ne’e fó enerjia. Bainhira rona, ita sente forsa no uniaun hanesan timoroan. Ne’e emosionante bainhira haree ita-nia rai partisipa iha eventu hanesan ne’e, liuliu hala’o tan iha Timor-Leste”, dehan.
Sentimentu hanesan partilla mós husi jogadora voleiból praia Miguelia Ximenes, ne’ebé espresa emosaun iha momentu ne’e. “Ami iha espíritu nasionalizmu, haforsa ami-nia an, iha tempu jogu hanesan ne’e maski ekipa feto la hetan vitória primeiru lugár, maibé segundu lugár ida-ne’e mós kontente ida ba ami”.
Igildo Ximenes, adeptu ida ne’ebé asite mós jogu ne’e espresa nia sentimentu kontente. “Mezmu la sai primeiru lugár mós, ha’u sente satisfeito tebes. Timor-Leste hatudu duni nia kapasidade kompete iha nivel internasionál”.
Múzika Timór Ha’u Hadomi Ó la’ós halo dansa de’it ema timoroan sira, maibé atleta voleiból praia husi nasaun CLPL ne’ebé prezente iha Lesidere.
Notísia relevante: Portugál hetan medalla osan-mean iha voleiból praia maskulinu
Jornalista: Arminda Fonseca
Editora: Maria Auxiliadora
