Atleta portugeza oferese ba nasaun medalla osan-mean iha Karaté-do 48kg
DILI, 25 Jullu 2025 (TATOLI) – Atleta portugueza Ema Pinéu Lopes Fernandes sai kampiaun iha modalidade Karaté-do femenina iha kategoria kilógrama (kg) 48 iha Jogu Komunidade Nasaun Ko’alia Lian Portugál (CPLP) ba Edisaun da-XII, ne’ebé hala’o iha Dili.
Ema Pinéu halakon nia adversária husi Timor-Leste Melicia Auxiliadora da S. Gusmão iha jogu finál.
Portugál no Timor-Leste ne’ebé hatudu jogu atrativu iha inísiu ho tátika no estratéjia idaidak nian lansa tebe, tuku, no halo defensivu ba idaidak nia an, hodi bele kona iha nia alvu. Ho esforsu sira hotu ne’ebé iha, hatudu pontu ba Timor-Leste-Portugál (3-4).
Iha kompetisaun ne’e, halo adeptu sira husi país rua halo barullu maka’as iha Jináziu Dili hodi apoia ba idaidak nia atleta, mezmu husi parte Timor-Leste halo esforsu, maibé tempu hatudu kompleta minutu 2:00 nune’e halo jogu termina no atleta portugeza ne’e mak iha direitu absoluta manán iha jogu finál ida-ne’e.
“Kontente ho rezultadu husi atleta hodi hetan primeiru lugar iha jogu ne’e no lori medalla osan-mean”, Treinadór Karaté husi Portugál, Nuno Morreira, hateten ba Tatoli, ohin.
Nia dehan, atleta portugeza ne’e iha iha abilidade di’ak, tanba antes ne’e partisipa iha kompetisaun internasionál ni sai mós hanesan kampiaun. Nune’e, dezde inísiu iha eventu Jogu CPLP sempre otimista hodi lori rezultadu di’ak.
Maski nune’e, nia mós husu ba atleta timoroan atu kapasita an di’ak liután hodi dezenvolve an iha modalidade Karaté-do.
Iha sorin seluk, Treinadór Karaté husi Timor-Leste, Andreas da Silva Ailerbito Quef, kontente mós ho rezultadu ne’e, maski hetan de’it medalla osan-mutin.
Tuir nia, ida-ne’e mós aumenta esperiénsia atleta nasionál no prepara an di’ak liutan iha eventu internasionál tuirmai.
Iha modalidade ne’e, Melicia Auxiliadora (Timor-Leste) hetan segundu lugar no terseiru okupa husi Jordina Jordão Américo (Mosambike) ne’ebé hetan medalla osan-metan ka bronze.
Atleta femenina husi nasaun lima ne’ebé kompete iha modalidade Karaté-do ba kategoria 48kg mak hanesan husi Mosambike, Portugál, Angola, Timor-Leste no Kabuverde.
Notísia relevante: Karaté-do femeninu 48kg: Timor-Leste no Portugál tama ba finál
Jornalista: Nelson de Sousa
Editora: Maria Auxiliadora
