Fatulia hahú implementa reabilitasaun estrada liuhosi fundu PNDS
DILI, 25 Jullu 2025 (TATOLI)—Autoridade Suku Fatulia, Postu Administrativu Venilale, Munisípiu Baukau hahú implementa atividade regulár Programa Nasionál Dezenvolvimentu Suku (PNDS) síklu VII hodi reabilita estrada diresaun Uai-to-bono to’o Sede Suku Fatulia.
Xefe Suku Fatulia, Angelino Moises Pereira esplika alokasaun orsamentu hamutuk rihun $40-resin iha-ne’ebé kustu ba fundu infraestrutura rihun $38 hodi reabilita estrada kilómetru ida-resin tuir planu prioridade suku ne’ebé aprezenta husi kada aldeia.
“Hau hanoin ida-ne’e bele fasilita ona ita-nia komunidade,” Xefe Suku Fatulia informa ba TATOLI liuhosi telefónema, Sesta ne’e.
Notísia relevante: Autoridade Fatulia sei reabilita estrada dirasaun Uai-to-bono
Angelino relata projetu referidu husi área Uai-to-bono parte estrada nasionál diresaun Baukau bá Vikeke to’o Sede Suku Fatulia iha-ne’ebé tipu serbisu cor beton, ateru, valeta metru 150 inklui cor deker.
Nia salienta Konsellu Suku aprova proposta husi membru Konsellu Aldeia tanba konsideradu estrada mak sai alternativu no determina ba prosesu dezenvolvimentu liuliu fasilita movimentu komunidade hodi asesu merkadu no eskola.
“Estrada ne’e hanesan estrada alternativu ba estrada nasionál husi Baukau bá Vikeke,” Angelino informa.
Angelino aprezenta katak progresu implemetasaun projetu referidu finaliza ona ateru no kontinua ba item seluk tuir planu serbisu, iha-ne’ebé sei termina ho durasaun serbisu fulan tolu.
Suku Fatulia hamutuk aldeia haat kompostu husi Bahadato, Osso-uaque, Uatulia-ana no Uai-to-bono ho totál populasaun 2.721 husi uma-kain 688.
Jornalista: Natalino Belo
Editór: Xisto Freitas da Piedade
