DILI, 25 Jullu 2025 (TATOLI)-Komandante Komponente Navál, Komodoro Higino das Neves, informa Xefe Estadu Maiór Jenerál Forsa Armada (XEMGFA), Domingos Raul Falur Rate Laek, fó ona instrusaun ba Komandu Forsa Apoiu Servisu atu instala baze militár iha área suku Sananai, Postu Administrativu Laklubar, Munisípiu Manatutu.
“Sei halo estrada uluk, depois halo konstrusaun ki’ik-oan para depois ita-nia treinu báziku ne’e sei muda ba ne’ebá”, Neves hateten iha nia intervensaun bainhira ensera ezersísiu kombinasaun arma C-25 ne’ebé halo iha Komponente Navál, sesta-ne’e.
Nia dehan, estabelesimentu baze militár ne’e bazea ba kedas iha lei konseitu estrátéjiku militár, define baze militár komponente nian iha lei-ne’e, ne’ebé afirma iha futuru komandu F-FDTL tenke iha tán kampu batalla iha Manatutu nu’udar baze ba treinamentu militár.
Nia akresenta, Sentru Instrusaun Komandante Nicolau Lobato iha Metinaru dala-ruma iha futuru sei uza ba treinu avansadu nian ho tan treinu sira ne’ebé hanesan akadémiku, liuliu treinu ba formasaun ofisiál nian.
“Maibé treinu báziku sei muda ba kampu militár iha Manatutu inklui ezersísiu kombinasaun arma sira hanesan agora ne’e sei halo iha kampu militár Manatutu. Depois futuru sei iha ezersísiu ho país sira seluk, ita sei halo iha ne’ebá, maibé primeiru ita tenke kria kondisaun, tenke estrada uluk, tenke kria uluk infrastrutura bázika iha ne’ebá, iha bee, fasilidade ruma liuliu eletrisidade hotu para ita bele muda ba futuru treinamentu”, nia esplika.
Tanba ida-ne’e iha ona konseitu estrátéjiku militár ne’ebé define ona. “Ha’u fiar katak Governu sei preokupa. Fiar katak señor ministru iha mehi ida-ne’e para atu dezenvolve”, nia afirma.
Manatutu Sananai, tuir nia fatin estrátéjiku ba ezersísiu. Ida-ne’e la afeita ba populasaun tanba fatin luan, espasu iha para bele tiru morteiru, kainaun. Iha espasu ba kilat ki’ik no boot bele tiru iha ne’ebá. Tanba haree ona katak fatin ne’ebá ne’e mais estrátéjiku ba dezenvolvimentu forsa armada Timor nian.
Notísia relevante: MD lansa planu mestre ba konstrusaun baze militár no rezidénsia militár
Jornalista : Natalino Costa
Editora : Rita Almeida
