DILI, 25 Jullu 2025 (TATOLI)-Atleta timoroan Maricha Juditha F. Fátima Mota sai vensedór iha modalidade Karaté-do femeninu iha kategoria kilógrama (kg) 53 iha Jogu Desportu Komunidade Nasaun Lian Portugés (CPLP-sigla portugeza) ba Edisaun da-XII.
Maricha halakon nia adversária portugeza Leonar da Silva Gonçalves, iha jogu finál.
Iha inísiu jogu parte rua hatudu tátika, estratéjia tuir idaidak nian, atleta portugeza aproveita lansa kedas tebe, tuku maka’as, halo jogu sai manas, hodi kona alvu no marka pontu (2-0).
Halo adeptu Portugál barullu maka’as iha Jinájiu Dili nia laran, maski nune’e la hamate atleta husi illa krokodilu ne’e ninia mental hodi lansa tebe no tuku ne’ebé kona-ba alvu hodi muda pontu (1-2) iha minutu 1:7.
Husi ne’e adeptu Timor-Leste hakilar lian maka’as hodi fó apoiu totál. Atleta husi país rua ne’e kontinua hatudu idaidak nian tékniku ne’ebé ho atrativu tebes, maibé ho estratéjia no esforsu atleta timoroan ne’e xoke atleta portugueza hodi fó oportunidade lansa kedas tuku iha parte oin laran halo pankada mean no halo moras.
Nune’e, oin halai no tuur tun ba rai no hetan kedas asisténsia husi ekipa médika ne’ebé halo vijilánsia. Pauza iha minutu balun hodi kontinua fali jogu no atleta rua ne’e muda pontu ba (2-2) to’o tempu ramata.
Tanba tuir sistema jogu, atleta timoroan mak iha direitu tomak atu manán iha finál ne’e, tanba nia mak hetan uluk pontu iha inísiu jogu ne’e.
“Agradese ba Na’in-Feto ne’ebé haraik ona ba ha’u, ne’ebé lori nasaun bele sai primeiru lugar”, nia hateten ba Tatoli iha Jináziu Dili, ohin.
Nia agradese ba família, liuliu inan no aman, treinadór, kolega no timoroan sira hotu nia apoiu. Nia la espera ho rezultadu ne’e, mezmu hasoru atleta husi nasaun sira ne’ebé iha abilidade di’ak no bele hetan konkista vitótia ne’e.
“Durante ne’e esforsu maka’as, hetan sansaun, hirus, baku, to’o ikus hetan duni primeiru lugar”, nia espresa ho kontente.
Iha eventu ne’e, portugeza Leonar da Silva hetan medalla osan-mutin, Nária Isabel Afonso de Freitas Soares (Angola) no Rãnia Sofia Livramento Rodrigues (Kabuverde) hetan terseiru lugár ho simu medalla osan-metan ka bronze.
Koñese Maricha Juditha
Maricha moris iha loron 26 fulan-Marsu 2010, iha Dili. Nia inan mak Amélia da Silva Araújo husi Ainaro, no aman Henrique Riki Fahi (matebian) husi Suai. Nia nu’udar oan dahuluk no iha alin mane ida.
Daudaun halo estudu iha Eskola CAFE (Centro de Aprendigazem e Formação Escolar) Taibessi, Dili, iha désimu anu.
Ba nia, durante ne’e laiha dezafiu ba nia entre eskola no treinu. Sempre halo jestaun di’ak ba tempu, tanba tempu ba nia nu’udar osan-mean no la husik leet de’it, tanba xave ba nia mak treinu. “Laiha dezafiu”, nia salienta.
Nia hahú envolve iha modalidade Karaté hahú iha tinan 2020 tanba nia hakarak rasik.
Maricha hanesan atleta prestada. Antes ne’e, partisipa ona kompetisaun Karaté-do iha rai-laran iha 2023 no hetan segundu lugar hodi simu medalla ho sertifikadu.
Nia mehi hakarak sai atleta ne’ebé semo aas liutan, bainhira selesionada hodi partisipa iha eventu internasionál Jogu CPLP tinan ne’e.
“Iha eventu ne’e, bele hetan esperiénsia. Dahuluk, lori nasaun nia naran iha Jogu CPLP tinan ne’e”, nia hateten.
Maricha hetan parabén tanba sai kampeaun iha jogu femeninu ho modalidade Karaté-do, iha kategoria 53kg.
Oferese medalla osan-mean ba nasaun ne’e hanesan orgullu ida ba nia ba timoroan hotu, tanba hamorin Timor-Leste nia naran, No hatudu daudaun katak timoroan iha talentu no abilidade. Sira prontu kompete iha eventu internasionál.
Maricha kompromete katak ba oin sei buka dezenvolve liután nia talentu ne’e. Nia sujere ba Governu atu toma atensaun no investe iha setór desportu iha modalidade oioin hodi tulun atleta timoroan sira-nia dezenvolvimentu no sira-nia talentu.
Notísia relevante: Maricha Juditha prontu enfrenta Portugál iha finál Karaté-do 53kg
Jornalista: Nelson de Sousa
Editora: Maria Auxiliadora
