MF sei halo negosiasaun ba garantia millaun $80 ba projetu fotovoltaika solár iha Laleia

DILI, 25 Jullu 2025 (TATOLI)- Konsellu Ministru autoriza Ministra Finansa (MF), Santina Cardoso, atu halo negosiasaun ba garantia Estadu to’o montante másimu millaun $80 ba projetu dezenvolvimentu sentrál fotovoltaika solár iha Laleia, munisípiu Manatutu.

Garantia ne’e ho objetivu atu asegura kumprimentu ba obrigasaun Eletrisidade Timor-Leste (EDTL), hanesan estabelese ona iha Kontratu Sosa Enérjia ne’ebé asina ona ho konsórsiu promotór projetu nian.

Tuir dokumentu Governu ne’ebé Tatoli asesu, projetu ne’e sei implementa husi konsórsiu ne’ebé kompostu husi EDF Renouvelables International S.A.S. no husi I-Environment Investments Pacific Pty Ltd.

“Objetivu mak atu hasa’e kapasidade nasionál produsaun nian no distribuisaun eletrisidade, diversifika fonte enerjétika no insentiva utilizasaun teknolojia sustentavel sira, ho foku ba potensiál enerjia solár nasaun ne’e nian”, nota ne’e dehan.

Inisiativa ida-ne’e sei kontribui hodi kria sistema enerjétiku ida ne’ebé seguru, estavel, no sustentavel liu, lori benefísiu diretu ba populasaun no hodi insentiva dezenvolvimentu ekonómiku. Projetu ne’e lansa ofisialmente iha loron 22 fulan-jullu, durante serimónia komemorasaun aniversáriu EDTL nian ba da-5.

Tuir pájina EDTL nian, iha selebra tinan lima ezisténsia empreza, marka istória foun ba dezenvolvimentu setór eletirisidade iha Timor-Leste, tanba EDTL, E.P asina akordu Power Purchase Agreement (PPA) Solar Energy no Battery Energy Storage System (BESS) ho konsórsiu EDF, ITOCHU I-Enviroment, ne’ebé sei implementa iha Laleia.

Ministru Obra Públika, Samuel Marçal, hateten akordu ne’ebé asina kona-ba projetu Solár PV sei fó benefísiu boot ba Timor-Leste, tanba projetu ida-ne’e sei kontribui ba dezenvolvimentu sustentavel no protesaun ambientál.

Notisía relevante: EDTL no empreza konsórsiu internasionál sira asina PPA iha Marsu

Jornalista: Arminda Fonseca 

Editora: Maria Auxiliadora