DILI, 25 Jullu 2025 (TATOLI) – Primeiru-Ministru interinu Tailándia nian, Phumtham Wechayachai, ohin simu ho laran-haksolok Primeiru-Ministru Malázia nian Anwar Ibrahim nia oferta atu sai mediadór sesárfogu iha konflitu fronteira ne’ebé la’o hela ho Kamboja.
Maibé, Phumtham subliña katak Kamboja tenke hatudu sinseridade ne’ebé klaru, hodi akuza Phnom Penh hodi hahú provokasaun sira no atake transfronteirisu sira, refere Ajénsia Notísia Tailándia (PNA, sigla inglés) ne’ebé Ajénsia TATOLI asesa, sesta ne’e.
Phumtham nia komentáriu sira tuir Anwar nia post iha Facebook, iha ne’ebé Prezidente ASEAN nian hatete katak nia diskute ona situasaun fronteira nian ho Phumtham no Primeiru-Ministru Kamboja nian, Hun Manet.
Phumtham hatete katak nia konkorda katak tenke hetan dalan ida hodi hakotu konfrontu sira, maibé ba sesárfogu, tenke iha klareza hosi Kamboja.
Nia afirma katak Tailándia buka ona negosiasaun sira lahó susesu no katak konflitu atuál mosu hosi forsa Kamboja sira ne’ebé tiru ba territóriu Tailándia nian, viola akordu anteriór ida hodi koloka tropa armadu sira ba templu Ta Muen Thom.
Phumtham fó-sai katak enkuantu Anwar bolu nia horisehik kalan, eventu sira ohin dadeer nian “la aseitavel”, tanba Kamboja loke frente boot haat iha Rejiaun Ezérsitu Daruak Tailándia nian, ne’ebé kobre provínsia sira Buriram, Surin, Sisaket no Ubon Ratchathani.
Nia kondena Prezidente Senadu Kamboja nian, Hun Sen, no responsabiliza Primeiru-Ministru Hun Manet hamutuk ba atake sira-ne’ebé nia alega katak alvu ba ema sivíl sira, hodi sita bomba ida iha loja konveniénsia estasaun gazolina nian no atake diretu ida iha Ospitál Phon Dong Rak hanesan violasaun maka’as sira ba lei internasionál.
Konflitu fronteira Tailándia-Kamboja nian tama iha loron daruak, ho ostilidade sira-ne’ebé hahú iha madrugada iha templu Ta Muen Thom no Ta Khwai nia sorin iha distritu Phanom Dong Rak, provínsia Surin. Funu sira habelar ona iha fronteira tomak. Relata ona tiru artillaria ne’ebé maka’as no kontínuu.
To’o tuku 9:00 AM ohin (25 Jullu), Ministériu Saúde Públika relata vítima mortál hamutuk 14 no kanek 31 entre ema sivíl sira-ne’ebé afetadu hosi konflitu fronteira.
Aleinde ne’e, Phumtham hatete katak Kamboja tenke responsabiliza ba hahalok sira-ne’ebé maka konstitui krime funu nian. Nia mós konfirma aprovasaun ba finansiamentu adisionál baht millaun $100 ba provínsia fronteira sira no aumentu ida iha kompensasaun ba vítima mortál sira ba baht millaun $1, ho kompensasaun ba kanek sira-ne’ebé sei konsidera tuir kazu idak-idak.
Porta-vós Ezérsitu Reál Tailándia nian, Majór-Jenerál Winthai Suvaree, nega ho akuzasaun sira hosi imprensa Kamboja nian katak Tailándia uza aviaun kombate F-16 hodi ataka zona sivíl sira iha Kamboja.
Nia afirma katak operasaun militár Tailándia nian sira liuliu alvu ba objetivu militár sira no hala’o tuir lei internasionál no prinsípiu umanitáriu sira.
Notísia relevante: Ezérsitu Tailándia lansa ofensiva hasoru Kamboja
TATOLI
