DILI, 25 Jullu 2025 (TATOLI) – Ezérsitu Reál Tailándia nian (RTA) lansa ona “Operasaun Yuttha Bodin”, ofensiva kombinadu ida hosi rai no aérreu.
Jenerál Pana Klaewplodtuk, komandante operasaun sira kontra-Kamboja nian, superviziona ofensiva. Komandu Área Ezérsitu Daruak nian relata susesu inisiál sira iha fatin fronteira 10, inklui atake aéreu F-16 nian iha pozisaun sira Kamboja nian iha Postu Observasaun Chong Aan Mah no Phu Phi.
Portavós RTA nian, Majór Jenerál Winthai Suvaree, informa loron dahuluk operasaun nian susesu no nesesáriu ba autodefeza, hodi afirma katak Tailándia laiha intensaun atu ataka Kamboja.
Nia afirma katak asaun sira RTA nian lejítimu tuir lei internasionál no alvu de’it ba objetivu militár sira, refere Ajénsia Notísia Tailándia (PNA, sigla inglés) ne’ebé Ajénsia TATOLI asesa, sesta ne’e.Winthai husu ba negosiadór sira iha nível governu nian hodi rezolve konflitu ho dame, hodi nota impaktu prejudisiál ba sidadaun sira nasaun rua nian.
Nia kondena atake sira Kamboja nian hasoru alvu sivíl sira hanesan violasaun ba regra internasionál sira, hodi subliña katak operasaun militár sira tenke limita ba objetivu militár sira.
Nia konfirma katak atake aéreu F-16 nian hanesan apoiu ne’ebé presiza, ho distánsia dook, parte ida hosi resposta ne’ebé justifikadu. Maski la fornese númeru sira hosi vítima sira Kamboja nian, nia espresa dezeju ida atu hakotu lalais operasaun.
Iha fatin ketak, RTA fó sai katak konfrontu sira hahú besik tuku 04;00 iha loron-sesta iha provínsia sira Ubon Ratchathani no Surin, ho forsa kamboja sira uza arma pezadu sira. Forsa tailandeza sira hatán ho tiru apoiu, hodi fó hanoin ba ema sivíl sira atu evita zona sira envolvimentu nian.
Notísia relevante: ASEAN husu Kamboja no Tailándia atu implementa sesárfogu
TATOLI
