DILI, 25 Jullu 2025 (TATOLI) – Governu delibera hodi aprova Roteiru ba Instalasaun Supremu Tribunál Justisa, ne’ebé aprezenta husi Ministru Justisa, Sérgio Hornai.
Ministru Justisa esplika katak roteiru ne’e define pasu no atividade sira ne’ebé presiza ba instalasaun tomak Supremu Tribunál nian, hodi espesifika entidade sira ne’ebé responsavel ba ninia ezekusaun.
Nia dehan husi asaun sira ne’ebé planeadu, inklui alokasaun verba ne’ebé presiza iha Orsamentu Estadu tinan 2026, kria Komisaun Rekrutamentu no Selesaun ida ne’ebé responsavel hodi rekruta no nomeia membru sira júri selesaun nian, selesaun Juis Konselleiru, nomeasaun Prezidente Supremu Tribunál, no elaborasaun diploma ne’ebé sei formaliza ninia instalasaun.
Tuir nia, asaun sira ne’ebé prevee iha prazu espesífiku, ho atividade fundamentál tenke remata, tuir kronograma, to’o finál semestre dahuluk tinan 2026 nian, nune’e bele garante inísiu husi funsionamentu Supremu Tribunál Justisa nian iha Juñu tinan oinmai.
“Ami hotu halo diskusaun ne’ebé kle’an kona-ba roteiru ne’e oinsá husi Governu bele haree hela Lei Organizasaun Judisiária ne’ebé foin lalais sofre alterasaun, nomós ita-nia preparasaun sira oinsá atu estabelese kondisaun balun atu hatán ba estabelesimentu Tribunál Supremu iha futuru”, Sérgio Hornai hateten iha Palásiu Governu, ohin.
Nia dehan ida-ne’e la’ós kompeténsia absoluta husi Governu nian de’it, maibé iha ne’ebá fó vizibilidade, luz ida ba roteiru ne’e ba Ezekutivu atu kria kondisaun hodi hatán ba sekuénsia balun oinsá atu hakat, nune’e estabelese Tribunál Supremu iha futuru.
“Ohin ha’u aprezenta, sustenta ho argumenta sira ne’e oinsá halo rekrutamentu. Ekipa halo dezignasaun ba halo selesaun no rekrutamentu. Ita halo rekrutamentu ne’e tantu juís sira rai-laran ka rai-li’ur. Sei presiza sira ne’e hotu, aumezmu tempu ita kria ekipa júri ne’ebé halo selesaun ba ita-nia futuru juís konselleiru sira iha Tribunál Sumpremu atu ezerse sira-nia funsaun”, nia dehan.
Notísia relevante: PTR deside edifísiu Tribunál Distritál Dili tuan instala provizóriu ba Supremu Tribunál Justisa
Jornalista: Arminda Fonseca
Editora: Maria Auxiliadora
