DILI, 25 Jullu 2025 (TATOLI)–Treinadór Voleiból praia hosi Mosambike, Osvaldo Machava, husu ba Governu Timor-Leste atu dezenvolve liután Voleiból Praia.
“Rekomendasaun ida ba Governu Timor-Leste relasiona ho Voleiból Praia bele sai jeneralizadu liután, bele iha jogadór barak liután, nune’e Timor-Leste bele buras iha beach volley (Voleiból Praia) iha talentu barak. Tanba husi pontudevista organizasionál, buat hotu la’o di’ak. Di’ak liu aproveita oportunidade hodi dezenvolve beach volley iha Timor-Leste,” Osvaldo Machava hato’o ba Ajénsia Tatoli, iha kampu Voleiból Praia, Bidau-Lecidere, Sesta ne’e.
Nia dehan, durante ne’e atleta sira husi Mosambike sempre envolve iha jogu lokál sira.
Iha sorin seluk, nia nota mós katak, Timor-Leste organiza Jogu Desportivu Komunidade País Lian Portugés (CPLP, sigla portugés) ba dala-XII ne’e di’ak tebes.
“Ami-nia diáriu liuliu entre ema lokál sira, ida-ne’e organizasaun ida-ne’ebé di’ak tebes. Desde loron ne’ebé ami to’o iha ne’e, simu ami ho di’ak tebes. Ami bele haree katak Timor-Leste prepara ona ho di’ak hodi organiza eventu ne’e,” nia akresenta.
Notísia relevante : Ekipa feto Voleiból Praia husi Mosambike hetan terseiru lugár
Iha sorin seluk, Treinadór ne’e husu atu dezenvolve liután atleta Voleiból Praia.
“Entaun ha’u tenke treinu liután, ha’u tenke fiar treinadór sira, sira halo serbisu di’ak. Entaun ha’u tenke dezenvolve atleta barak liután no prezente iha kompetisaun sira tuirmai,” nia katak.
Nune’e mós, Treinadór ekipa Voleiból praia mane husi Ángola, Osvaldo Márcio de Souza Moreira, hateten, sira-nia hanoin organizasaun Jogu Desportivu CPLP ne’e diak, liuliu iha Timor-Leste, maibé distánsia dook atu to’o iha ne’e, husi nasaun barak presiza oras barak atu semo.
Osvaldo Márcio fó ezemplu, husi Luanda bá Indonézia maka voo oras 14, aumenta tan oras ida ho balun iha ne’e, maibé organizasaun Jogu Desportivu CPLP ne’e halo di’ak tebes.
“Buat hotu organizadu ho di’ak. Ami sempre hetan akompañamentu di’ak husi voluntáriu sira, matadalan sira ne’ebé orienta ami, fó matadalan no rekomendasaun sira hotu, tantu ba seguransa no mobilidade, ida-ne’e satisfatóriu. Ami-nia movimentu hotu-hotu, atleta sira-nia tama no sai, hetan monitorizasaun husi membru sira husi organizasaun jogu no ami satisfeitu,” nia katak.
Treinadór ne’e prefere joven tenke ativu iha jogu desportivu no presiza informasaun barak liután ba sira ne’ebé la partisipa iha jogu sira inklui asisténsia no monitorizasaun online barak liután.
“Publisidade informasaun barak liután kona-ba jogu sira atu ema hotu bele akompaña, tanba sira joven hela no sira iha dalan atu sai jogadór internasionál seniór sira. Entaun, di’ak ba ema hotu atu akompaña, publisidade barak liután,” nia sujere.
Treinadór nota, jogu Voleiból Praia iha loron hirak ne’e la’o di’ak tebes maibé ekipa to’o tarde tanba kestaun administrativu.
“Ami nervozu iha primeira vez no depois ami tenke to’o loron rua antes kompetisaun hahú, maibé tanba kestaun administrativu sira, ami to’o iha loron ida antes kompetisaun no joga iha dadeersan. Diferensa oras iha ne’e iha Angola maka oras ualu atraza. Ami toba iha Angola iha momentu ne’ebá, nune’e ami lamenta tebes. Kona-ba jogu daruak kompetisaun nian, bainhira ami adapta liu, hasoru Timor-Leste, ikus mai ami la manán,” nia konta tuir.
Treinadór Portugál, Nuno santiago, sente onradu bainhira ekipa Voleiból Praia tantu mane no feto bele hetan vitória.
“Ida-ne’e esforsu ne’ebé ekipa Portugál iha. Ami kontente tebes tanba manán ona. Di’ak, ami joga torneiu mistu ida-ne’ebé laiha defeitu. Ami manán jogu hotu, maibé bainhira ami to’o iha faze desizivu sira torneiu. Treinu maka’as tanba husi saida maka ha’u haree, ita-boot iha kondisaun, Iha ema barak ne’ebé gosta desportu ne’e mós tanba iha ema barak ne’ebé asiste no sira sempre iha ami-nia jogu sira hotu,” nia katak.
Ekipa Timor-Leste fó difikuldade maibé ekipa Portugál nafatin esforsu no konsege manán.
“Ekipa Timor mós iha kualidade barak no ikus mai ami nota difikuldade, ne’ebé ami hein hela, maibé depois ami hakmatek no konsege hakbesik ba ami-nia nível no nune’e manán, tanba ne’e ami kontente tebes. Ida-ne’e signifika katak la’ós fásil no joga hasoru atleta sira ho kualidade,” nia apresia.
Nuno Santiago dehan, realizasaun jogu referidu iha Timor-Leste ho di’ak tebes nune’e nia parte agradese ba povu Timor-Leste.
“Ha’u tenke fó parabéns ba Timor no povu Timor tomak tanba organizasaun ne’e di’ak tebes. Di’ak, tantu hahán ka otél ne’ebé ami hela ba, sira trata ami ho di’ak tebes. Povu Timor tomak di’ak no sira amigável tebes, tanba ne’e ha’u hakarak agradese iha ne’e,” Treinadór tenik.
Iha fatin hanesan, Árbitu Voleiból Praia, Claudia Pinto, orgullu bele simu medalla.
“Ha’u orgullu tebes tanba ami-nia ekipa manán medalla bronze. Ho determinasaun boot, emosaun boot, haree sira-nia konfiansa hodi uza téknika sira ne’ebé sira halo di’ak liu, no agradese ba Maromak, sira konsege manán medalla bronze,” nia hato’o.
Jornalista : Osória Marques
Editora : Julia Chatarina
