DILI, 24 Jullu 2025 (TATOLI)–Ekipa Voleiból Praia feto husi Mosambike marka terseiru lugar hafoin kontra Kabuverde iha Jogu Desportivu Komunidade País Lian Portugés (CPLP, sigla portugés) ba dala-XII.
Iha kompetisaun amizade ne’e, ekipa feto Mosambike reprezenta husi Alaima Ama Mahumane (1) no Auria Machava (2), enkuantu Kabuverde reprezenta husi Catarina Fonseca (3) no Maria Clara Lima (4).
Iha inísiu jogu, ekipa Mosambike domina kampu no hatudu tátika ne’ebé nakonu ho esforsu hodi manán set dahuluk 21 kontra Kabuverde 5.
Notísia relevante : Ekipa feto Portugal husi modalidade Voleiból Praia tama semi-finál
Bainhira hakat ba set daruak, maski ekipa Kabuverde esforsu, maibé ekipa Mosambike nafatin buka meiu hodi hetan pontu 21 no Kabuverde 9.
Treinadór Mosambike, Osvaldo Machava, espresa sentimentu ksolok bainhira hetan vitória terseiru lugar ba jogu ne’e.
“Bainhira ita kontente, ita manán medalla ida, e’e maka ami-nia objetivu. Ida-ne’e maka sentimentu ksolok, ksolok tebes ami hetan terseiru lugár,” nia tenik.
Jornalista : Osória Marques
Editora : Julia Chatarina
