Kompetisaun diskursu públiku fanu juventude Bobonaru prezerva espíritu 12 Novembru
BOBONARU, 10 Novembru 2026 (TATOLI)-Komisaun Organizadora ba Komemorasaun Masakre Santa Krús, 12 Novembru 1991, no Loron Nasionál Juventude, iha Munisípiu Bobonaru organiza kompetisaun diskursu públiku hodi fanun juventude, liuliu estudante sira, atu komprende no prezerva espíritu luta no sakrifísiu juventude rezisténsia nian ba libertasaun nasionál.
Sekretáriu Komisaun Organizadora, Joanico Pereira Graciano, hatete katak atividade ne’e nu’udar programa anuál ne’ebé organiza hodi fó oportunidade ba joven sira atu reflete no komprende luta no sakrifísiu ne’ebé juventude rezisténsia sira halo iha luta ba independénsia Timor-Leste.
“Programa ida-ne’e kada tinan ita halo iha Postu Administrativu Maliana. Objetivu mak atu fanun juventude sira, liuliu estudante-oan sira, atu banati tuir saida mak juventude rezisténsia sira halo iha tinan 30 liubá, relasiona ho Masakre 12 Novembru 1991”, Joanico Pereira Graciano hatete ba jornalista sira iha salaun enkontru Postu Administrativu Maliana, tersa-feira ne’e.
Partisipante husi Eskola Sekundária Jerál II Malibaka Yamato Maliana, Melcio Sarmento Laco, ne’ebé hetan primeiru lugar iha kompetisaun diskursu públiku, orgullu tanba bele partisipa no hetan oportunidade atu komprende di’ak liután kona-ba signifikadu komemorasaun 12 Novembru.
“Ha’u sente orgullu tebes tanba bele partisipa iha kompetisaun ida-ne’e, ne’ebé fó oportunidade ba ami juventude sira atu komprende di’ak liután kona-ba istória no sakrifísiu ne’ebé akontese iha 12 Novembru”, Melcio Sarmento Laco afirma.
Partisipante seluk, Jeticia de Araújo Lopes, mós hatete katak nia sente orgullu tanba bele envolve iha atividade ne’e, ne’ebé fó oportunidade ba joven atu reflete espíritu luta husi juventude rezisténsia sira.
Nia subliña katak joven ohin loron iha responsabilidade atu prezerva liberdade ne’ebé hetan ona liuhusi sakrifísiu jerasaun uluk no kontinua kontribui ba dezenvolvimentu nasaun.
“Juventude uluk sakrifika sira-nia an ba independénsia. Agora, ita tenke prezerva liberdade ida-ne’e no dezenvolve nasaun atu sai di’ak liután, Jeticia de Araújo Lopes dehan.
Iha kompetisaun diskursu públiku ne’e, Melcio Sarmento Laco, hetan primeiru-lugar, João de Araújo, klasifika iha segundu lugar, Jeticia de Araújo Lopes iha terseiru lugar no Reinaldi Mali da Costa Marques hetan kuartu lugar.
Enkuantu atividade komemorasaun hahú ona iha loron 10 Novembru ho aprezentasaun husi oradór joven rezisténsia no kontinua ho kompetisaun diskursu públiku ba juventude.
Tuirmai, iha loron 11 Novembru, komisaun sei hala’o limpeza jerál iha Semitériu Saudozu Bonifácio, iha Suku Ritabou, nu’udar forma preparasaun ba atividade komemorasaun.
Iha loron hanesan, komisaun mós sei hala’o atividade reflesaun iha tuku 17h00, hodi hanoin hikas akontesimentu Masakre Santa Krús ne’ebé akontese iha tinan 1991, no aprezenta filmajen dokumentáriu kona-ba akontesimentu istóriku ne’e.
Atividade sei kontinua ho misa agradesimentu iha Parókia Santa Cruz Maliana, no kari ai-funan iha Semitériu Santa Krús no rate saudozu Bonifácio.
Komemorasaun Masakre Santa Krús no Loron Nasionál Juventude nu’udar momentu istóriku importante hodi hanoin hikas sakrifísiu, korajen no dedikasaun juventude timoroan sira-nian iha luta ba libertasaun nasionál, no enkoraja jerasaun foun atu kontinua hametin nasionalizmu, patriotizmu no kontribuisaun ba dezenvolvimentu Timor-Leste.
Notísia relevante: SEJD aloka orsamentu ba Sentru Juventude Bobonaro komemora 12 novembru
Jornalista: Sergio da Cruz
Editora: Maria Auxiliadora
