MANUFAHI, 27 Jullu 2025 (TATOLI)—Prezidente Autoridade munisípiu Manufahi, Luís Marçal da Costa Tavares, hakarak promove nafatin rekursu potensiál hanesan plantasaun kafé, ailot modo mahon, natar, pekuária no fatin turizmu sira, tamba ne’e presiza mós Governu nia tulun atu halo investimentu.
“Rekursu potensiál iha Manufahi daudaun ne’e tama iha planu autoridade no daudaun ami halo hela ezersisíu boot ida maibé kapasidade finanseira la to’o hodi dezenvolve rekursu sira. Maibé liuhusi maneira barak no liña koordenasaun ho ministeriál sira bele haree ba produtu hirak ne’e, autoridade mós daudaun ne’e iha planu ba futuru oinsá promove nafatin rekursu potensiál sira,” Prezidente Autoridade hateten ba jornalista sira iha edifísiu postu Fatuberliu, Sábadu ne’e.
Notísia relevante : Embaixadór Japaun inaugura Eskola Sekundária São Francisco de Assis Manufahi, benefísia estudante 719
Nune’e mós, Administradór postu administrativu Fatuberliu, Marcelo Marçal, hateten, Manufahi famozu ho rekursu potensiál oioin, maibé seidauk dezenvolve ho di’ak.
“Tanba ne’e presiza halo dezenvolvimentu ba rekursu sira ne’e hodi fó benefísiu ba Governu nomós ba komunidade. Entaun hanesan Autoridade lokál iha Fatuberliu, sempre halo koordenasaun ba liña sektorál sira ne’ebé tau-matan ba agrikultura, maibé tamba menus fasilidade entaun difikulta atu eleva di’ak liután ita-nia rekursu sira,” nia katak.
Autoridade postu ne’e dehan, tanba problema hirak ne’e mak halo komunidade abandona rekursu sira hanesan natar no to’os ne’ebé bele sai fonte reseita ba munisípiu.
Jornalista : Alexandra da Costa
Editora : Julia Chatarina
