KOVALIMA, 26 Jullu 2025 (TATOLI)–Governu liuhusi Vise-Primeiru-Ministru, Ministru Koordenadór Asuntu Sosiál no Ministru Dezenvolvimentu Rurál no Abitasaun Komunitária, Mariano Assanami Sabino, sábadu-ne’e entrega ró peska unidade-16 ba gropu peskadór haat iha suku Suai Loro, postu administrativu Suai, munisípiu Kovalima.
“Orsamentu husi apoiu ne’e maihusi transferénsia públika, apoiu ba grupu haat buka moris depende ba atividade peska”, Assanami dehan ba jornalista sira iha Suai Loro, ohin.
Nia dehan ró ne’ebé mak Governu apoiu, presiza koordena ho Ministériu Agrikultura, Pekuária, Peska no Floresta, tanba dezenvolvimentu rurál la’ós mesak, maibé ida-ne’ebé mak seidauk iha fó apoiu tenke koordena mós ho tékniku sira mak implementa.
Totál orsamentu rihun-40. Ministru, Marcos da Cruz, dehan Ministériu Dezenvolvimentu Rurál no Abitasaun Komunitária servisu hamutuk ho MAPPF. Tanba ne’e husu ba benefisiáriu sira organiza-án, servisu labele para, maibé utiliza atu tama tasi no kaer ikan.
“Hafoin kaer ikan labele faan ho presu ne’ebé ema bele sosa, la’ós ho presu aas, ema sei la sosa ikus mai la iha osan”, dehan nia.
Nia husu atu atensaun, tanba Governu haree mós ba agrikultura hodi dezenvolve, hahú moderniza liuhosi hadi’a infraestrutura.
Nia informa, fulan oin komesa konstrui irigasaun iha Maukola, tau atensaun mós ba tafara, tanba sei halo estudu ba konstrusaun.
Notísia relevante: Autoridade RAEOA entrega ró ida ba UPM atu reforsa seguransa tasi
Jornalista :Celestina Teles
Editora : Rita Almeida
