MANUFAHI, 26 Jullu 2025 (TATOLI)—Ministru Obra Públika, Samuel Marçal, notifika ona kompañia rua ne’ebé manán konkursu ba projetu konstrusaun ponte Tutuluru no Turon iha munisípiu Manufahi tamba nota katak laiha progresu.
“Progresu konstrusaun ponte Tutuluru no Turon la’o tarde uitaon, entaun ha’u bolu ona kompañia ne’ebé kaer konkursu ba projetu ne’e hodi fó ona notifikasaun, atensaun no fó tempu ba sira durante fulan-ida, maibé karik kompañia nafatin laiha progresu tenke foti desizaun,” Ministru informa ba jornalista sira iha edifísiu postu Fatuberliu, Manufahi, Sábadu ne’e.
Kompañia lokál My Friend haree ba ponte Tutuluru no kompañia internasionál Guang Ping International Sarl haree ba ponte Turon, ho totál naruk metru 135 ho kustu millaun $2,8.
“Haree hotu ba povu nia presiza, enkuantu Same Manufahi bailoro to’o de’it fulan-haat ka lima no bainhira kompañia sira serbisu tama fulan-haat ka lima sira nafatin la halo buat ida, signifika katak obra ne muda fali ba tinan oin,” nia akresenta.
Notísia relevante : Reprezentante povu husu Governu tau atensaun ba kondisaun infraestrutura bázika
Governante ne’e dehan, Ministériu Obra Públika (MOP) fulan ida-ne’e nia-laran sei haree enjiñeiru sira-nia dezempeñu serbisu, bainhira laiha progresu maka Ministru sei foti asaun hodi termina kontratu.
“La’ós de’it ba kompañia ida-ne’e, maibé ba obra sira seluk hotu ne’ebé tinan barak mak laiha progresu nafatin. Hau sei alista hotu kompañia sira no foti desizaun termina, se laiha kapasidade atu kaer fó ba ema seluk kaer atu nune’e obra bele la’o ho di’ak, tamba iha problema oioin, problema variável ne’ebé mak la hanesan no kada projetu la hanesan,” nia katak.
Iha problema balun ne’ebé difikulta implementasaun projetu maka impedimentu sosiál, hanesan komunidade lokál lakohi koopera, balun tanba kapasidade finanseira, ekipamentu, enjiñeiru inklui fatór natureza.
Antes ne’e, iha Marsu 2025, Ministru Samuel Marçal, informa, Governu sei harii ponte permanente lima hanesan ponte Tutuluru iha munisípiu Manufahi, Sana iha postu Uatulari , ponte Samalari Baukau, suku Liurai iha Aileu no suku Laisorulai iha Baukau.
Jornalista : Alexandra da Costa
Editora : Julia Chatarina
