MANUFAHI, 26 Jullu 2025 (TATOLI)-Ministru Obras Públika (MOP), Samuel Marçal, husu ba komunidade afetadu sira liuliu parte Kamea to’o Bekora atu pasensia hein prosesu indemnizasaun, tanba Governu sei la abandona povu ninia direitu.
Governante ne’e esklarese, tanba osan ne’ebé indemniza maihusi osan Estadu, tratamentu tenke tuir lei no sistema. “Ha’u mós foin asina tan proposta indemnizasaun balun”, Ministru informa ba jornalista sira iha edifísiu Fatuberliu, Manufahi, ohin.
Nia dehan, dalaruma mós tarde uitoan tanba komunidade balun sei duvida atu delega ema ne’ebé mak bele simu sira-nia osan. “Balun dehan, husik ha’u-nia oan mak simu, seluk fali mós nune’e, entaun difikulta mós tékniku sira hodi verifika ho lalais, ne’ebé la’ós dehan Governu toba ka abandona nia povu ne’e lae, buat hotu tenke tuir ninia prosesu satán osan povu nian ho montante ne’ebé boot”, nia esplika.
Iha sorin seluk tuir Tékniku Servisu Resentamentu MOP, Samuel Sani Soares, informa loloos ne’e atu publika ona kona-ba naran afetadu ba despezu administrativu iha suku Bekora no Kamea, maibé dadus sira-ne’e tenke prosesa liuhusi Unidade Verifikasaun dadus Ministériu Obras Públika nian, nune’e mak kleur.
“Prosesu ne’e lahanesan ho uluk, bainhira ekipa sira halo levantamentu dadus hotu kontinua kedas halo publikasaun lista afetadu husi Diresaun Nasionál Planeamnetu, maib’e agora oin seluk. Ida-ne’e tanba hodi garante dadus sira-ne’e loos no labele mosu desintendimentu iha faze pagamentu”, pesoál tékniku ne’e esplika.
Nia hateten, depois sira sei konvida mós husi parte Terras Propriedade, xefe suku, xefe aldeia, komunidade, seguransa no parte kompeténsia sira iha MOP hodi halo sosializasaun dezeñu estimasaun ba proprietáriu sira. Atu nune’e karik komunidade la konkorda bele halo reklamasaun no balun ne’ebe konkorda bela asina termu aseitasaun.
“Enkuantu iha pagamentu provisória ba suku rua Bekora no Kamea ba uma sira montante boot liu mak rihun atus-ida sanulu resin-hitu liu $117 no ba baraka sira montante boot liu mak atus rua $200”, nia informa.
Notísia relevante: Montana Diak hahú sobu uma ba alargamentu estrada Kuluhun-Bekora
Jornalista : Alexandra da Costa
Editora : Rita Almeida
