DILI, 28 Jullu 2025 (TATOLI)-Kapitaun basketeból feto U-16, Moza Malia da Silva Vicente, hatete kontente no orgullu tanba bele hola parte iha jogu desportivu entre Komunidade Nasaun sira ne’ebé ko’alia lian-portugés (CPLP, sigla portugés), atividade ne’ebé organiza husi Governu Timor-Leste iha Dili durante semana-ida.
“Partisipa jogu desportivu CPLP ne’e primeiru lori nasaun nia naran fó orgullu ba ha’u, inan aman, no família sira. Grasa ba Maromak, nu’udar joven ba nasaun nian, ha’u orgullu tebes tanba bele partisipa eventu ne’e”, Moza hanesan estudante eskola sekundária Annur hateten ba TATOLI, iha sábadu foin daudaun ne’e.
Oan dahitu husi maun-alin na’in-hitu ne’e husu ba joven sira hotu partisipa iha atividade pozitiva. “Kuantu ita partisipa iha atividade la di’ak sei fó impaktu ba ita nia-an. Hanesan joven tenke halo atividade pozitiva”, nia fó-hanoin.
Estudante desimu primeiru ne’e dehan, maski lakon hanesan ema presiza koko hodi to’o hetan rezultadu di’ak. “Ami-nia hakas-án mak hanesan ne’e ona hodi bele lori ita-nia nasaun ne’e. Ba oin ami sei hakas-án hodi nune’e ami bele di’ak liu ida-ne’e”.
Oan husi Florindo da Silva Vicente no Denia dos Reis haktuir antes selesiona, nia envolve-án iha jogu basketeból Kopa Don Bosco ne’ebé reprezenta nia eskola Sekundária Annur iha Janeiru 2025.
Moza ne’ebé moris iha loron 10 fulan-Marsu 2009 hatete envolve iha grupu naran Ali-Star tanba simu informasaun husi kolega naran Rui. “Entaun ha’u dehan duké uza tempu iha uma de’it, di’ak liu partisipa iha eventu saida de’it entaun ha’u envolve-án iha kolega nia grupu hala’o treinu, try out, grasa de Deus, ha’u bele selesiona tuir jogu desportivu CPLP”.
“Momentu ema telefone katak ha’u selesiona ba modalidade basketeból, ha’u kontente, obrigadu ba Nai Maromak liu ona prosesu ida-ne’e no ha’u tenke envolve hodi lori ha’u nia-án la’o ba oin”.
Nia dehan, sei kiik kedas gosta ona basket tanba ne’e sábadu no domingu sempre uza tempu ba treinu.
Notísia relevante: “Ha’u gosta ona basketeból desde ki’ik”
Jornalista : Natalino Costa
Editora : Rita Almeida
