Sasin deklara arguidu na’in-neen mak tuda mate Armandinho iha Bekusi
DILI, 28 Jullu 2025 (TATOLI)-Tribunál Judisiál Primeira Instánsia Dili, segunda ne’e kontinua halo julgamentu ba kazu Armandinho Lemos Soares ne’ebé lakon vida iha Bekusi, iha loron 28 fulan-Fevereiru 2024.
Sasin KMS deklara ba tribunál katak bainhira nia tuir matebian tanba loraik-ida tuur hela iha uma oin mak Armandino ho kolega-ida tula malu bolu hodi tuir sira.
Nia haktuir haree duni matebian tula mós bibi-ida, no dehan atu fa’an, maibé la hatene foti husi ne’ebé.
Husi Rotunda Taibesi tun ba direasaun rate Bekusi nian, nia dehan sira na’in-haat ho motór rua halai tuituir malu no besik malu, matebian mak halai uluk.
Bainhira sira to’o loja ida nia oin, besik rate Bekusi nian, sasin rona arguidu MAS mak basa liman hafoin na’in-haat maihusi estrada sorin liman karuk no liman loos tuda sasin no arguidu ida mak hamrik hasoru matebian hodi tuda to’o monu ho motór, no lakon vida.
Sasin deklara koñese didiak arguidu na’in-neen ne’ebé tuda sira tanba lampu mos leno kona arguidu sira-nia oin. Seluk fali mak sira ransu kleur ona iha Bekusi, hatene didiak sira-nia maneira la’o, hamrik no tuur.
Nia dehan, fatuk mos kona nia kotuk laran, ho ida-ne’e sira kondús motór kontinua halai husik fatin no matebian ho kolega-ida seluk.
Bainhira tribunál loke CCTV hodi fundamenta deklarasaun sasin iha sala jugamentu, KMS konsege identifika arguidu sira ne’ebé iha CCTV mak MAS, CdCSG, HdJF, LVS enkuantu arguidu rua seluk mak sasin labele identifika tanba oin la moos.
Nia dehan, arguidu MAS mak basa liman no lori hela besi kanu no fatuk tau iha loja nia oin no arguidu CdCSG mak iha CCTV la tau faru no arguidu HdJF la tau sapeo ne’ebé la’o tun husi motór no arguidu LVS mak halai.
Hafoin rona deklarasaun KMS, tribunál marka fali jugamentu ba loron 16 Setembru 2025, tuku 9:00 hodi kontinua rona depoimentu seluk.
Notísia relevante: Arguidu SCG nega akuzasaun MP ba kazu Armandinho nia mate
Jornalista : Natalino Costa
Editora : Rita Almeida
