OEKUSI, 29 Jullu 2025 (TATOLI) – Dom Virgílio Kardeál do Carmo da Silva, SDB, segunda ne’e, inaugura kapela Nossa Senhora Maria Auxiliadora iha birru Postusika suku Lifau sub-rejiaun Panete Makasar ne’ebé besik loos iha odamatan bo’ot monumentu Lifau, Rejiaun Administrativa Espesiál Oekusi Ambeno (RAEOA).
“Parabéns sarani sira iha bairru Postusika, tanba kapela referida harii besik loos odamatan boot fiar ninian ba rai Timor-Leste, mak Lifau, Timor ne’e ema hotu koñese Lifau. Ne’e duni, kapela ninia pozisaun iha ne’e, jeografikamente harii iha odamatan Lifau ne’e, katak sarani ne’ebé hela hale’u kapela Maria Auxiliadora, ita-bo’ot sira-nia kna’ar mós atu bali no kuida nafatin odamatan fiar ninian iha Lifau, ne’e responsabilidade ida, atu sai fatin-lulik nafatin husi jerasaun ba jerasaun,” Dom Virgílio Kardeál, iha omília misa inaugurasaun.
Notísia relevante:http://Lifau nu’udar odamatan Kristianizmu tama Timor-leste
Nia informa, Maria Auxiliadora ne’e, katak tulun na’in, inan ida-ne’ebé prontu atu Auxilia, inan ida-ne’ebé prontu nafatin atu tulun ita. Ita hotu iha inan ida maibé ita-nia nia inan to’o idade ona sei mate.
Maibé Maria Auxiliadora, inan ida-ne’ebé nunka mate, hela nafatin ho ita mak, na’in-feto, ne’ebé tulun na’in, ita iha moras, iha terus, iha ksolok no iha nakukun laran, inan ida-ne’ebé prontu atu fó tulun mai ita, entaun kapela ne’e lori títulu Nossa Senhora Maria Auxiliadora tulun na’in, katak sarani sira iha bairru Postusika, la sente mesak maibé senti hamutuk ho inan ida-ne’ebé prontu atu ajuda.
“Ita iha susar no terus nia laran, buka nafatin atu reza ba inan Maria Auxilidora, ne’e duni na’in-feto sei bali nafatin ita, no sarani sira mós presiza kuida nafatin kapela ne’e, atu sai fatin sentru ba fiar nian, ” nia fó hanoin.
Iha biban ne’e, Dom Virgílio, hato’o sentimentu, agradese ba sarani sira-nia esforsu, tanba serbisu maka’as, garante ona ho meiu limitadu maibé tau hamutuk osan, ho sakfrisíu oi-oin, maibé to’o mumentu ne’e bele inaugura ona, atu sai sentru ba selebrasaun misa no halo orasaun.
Daruak, bairru Postusika ne’e mak besik loos odamatan Lifau, nu’udar odamatan fiar sarani Katólika Timor-Leste nian, tan ne’e husik hela mensajén sira-ne’e ba sarani Postusika, ne’ebé haksolok ohin ho sira-nia kapela foun, ho tulun Santa Maria Auxiliadora, atu kontinua tau matan nafatin ba fatin sagradu Lifau nian, tanba fiar Katólika tama mai Timor liuhusi Lifau, ne’ebé oras ne’e tama ona ba tinan 500-resin.
Notísia relevante:Dom Virgílio fó krizma ba joven 220 iha Lifau
Iha biban ne’e, Katekista Kapela Nossa Senhora Maria Auxiliadora bairru Postusika, Joaquin Fernando Jorge Hornai Oliveira, agradese tanba durante konstrusaun kapela Nossa Senhora Maria Auxiliadora ho nia medida 13×10, hetan kontribuisaun másimu husi sarani sira iha bairru Postusika kada uma-kain kontribui dollár $20, hetan apoia fundu rihun $10 husi Primeiru-Ministru, Kay Rala Xanana Gusmão, no hetan apoia materiál husi kompañia PT Waskita Karya.
“Ami sente kontente, maske enfrenta dezafiu oioin, maibé ohin loron Kardeál bele mai to’o atu fó bensaun. Kontribuisaun ba oin, ami sei planu kada domingo sei selebra misa, kuandu ita ba parókia do’ok, entaun sira-ne’ebé laiha transporte la’o labele, bele mai misa de’it iha kapela ne’e,” nia dehan.
Notísia relevante:Dom Virgílio fó benvindu no enkoraja peregrinu husi Oé-Cusse
Entretantu, totál sarani sira iha bairru Postusika hamutuk uma-kain 112, ne’ebé maioria hela besik monumentu Lifau.
Jornalista: Abílio Elo Nini
Editór: Rafael Ximenes de A. Belo
