DILI, 29 Jullu 2025 (TATOLI)—Federasaun Karate-do Timor-Leste (FKTL) husu Governu atu kontinua aumenta investimentu iha área desportu nune’e garante kualidade atleta iha futuru.
Sekretáriu Jerál FKTL, António Carlos de Araújo hateten prosesu selesaun ba atleta liuhosi prosesu nune’e presiza nafatin apoia husi Governu liuliu kria kondisaun hanesan infraestrutura nu’udár parte investimentu ba atleta sira.
António Carlos hato’o agradese ba Governu tanba atribui ona subsídiu ba atleta sira hafoin kontribui no hatudu prestasaun iha jogu Desportivu Komunidade Nasaun Lian Portugés (CPLP-sigla portugeza) maibé federasaun nafatin iha obrigasaun atu fó-atensaun ba atleta hirak-ne’e, nune’e garante partisipa eventu kompetisaun iha futuru.
“Se governu haree ona atleta sira-ne’ebé hetan prestasaun iha Jogu CPLP iha pontensiál mak bá-oin presiza ona tau-matan, tanba ita konsidera sira hanesan eroi bainhira hatudu prestasaun iha nivel internasionál,” Sekretáriu Jerál FKTL informa ba TATOLI iha Jináziu Dili, Tersa ne’e.
Notísia relevante: Atleta Karate-do na’in-haat tuir ona pra-kompetisaun no preparadu atu kompete
Nia hatutan FKTL nafatin konsidera Governu nu’udár parseiru importante no garante kooperasaun relasiona ho dezenvolvimentu atleta iha modalidade Karate-do nune’e preparadu iha eventu CPLP tuirmai.
Entretantu, Karate-do aprezenta atleta hamutuk na’in-haat kompostu husi feto-rua no mane-rua partisipa iha Jogu CPLP, iha-ne’ebé oferese medalla haat kompostu osan-mean ida, osan-mutin rua no osan-metan ida.
Jornalista: Natalino Belo
Editór: Xisto Freitas da Piedade
