Atleta Karate-do na’in-haat tuir ona pra-kompetisaun no preparadu atu kompete
DILI, 15 Jullu 2025 (TATOLI)–Sekretariu Jerál Federasaun Karete-do Timor-Leste (FKTL), António Carlos de Araujo, hateten atleta Karate-do ne’ebé konfirmadu atu partisipa ka kompete iha jogu desportivu Komunidade Nasaun Sira Ko’alia Lian Portugés (CPLP, sigla portugés) hamutuk na’in-haat (4) tuir ona pra-kompetisaun no preparadu atu tun iha batalla.
Notísia Relevante: Karate-do prepara atleta na’in-haat bá kompete iha jogu CPLP
“Ita iha atleta na’in haat (4) mak prepara atu tuir jogu CPLP. Sira agora iha kondisaun ne’ebé di’ak, sira halo ona pra-kompetisaun no agora tama ona iha faze estratéjia oinsá mak bele enfrenta jogu ho adversariu sira,” Sekretariu Jerál ne’e hateten ba Agência Tatoli liuhusi programa “Entrevista Eskluziva” ho tópiku “Preparativu modalidade Atletizmu-Karate-do ba jogu CPLP” iha estúdiu Faról, tersa ne’e.
Nia esplika, atleta na’in-haat (4) ne’e kompostu husi mane rua (2) no feto rua (2) ne’ebé sei joga iha kategoria ne’ebé diferensa, balun sei joga iha klase menus kilograma 48, balun joga iha kilograma 53, balun joga iha kilograma 55 no seluk joga iha kilograma 60.
“Sira-nia preparasaun hahú kedan iha fulan-Janeiru to’o ohin loron. Agora sira estavel loos ona, hein atu tuir kompetisaun. Sira konsentra hamutuk ona iha Ótel Ramelau,” nia dehan.
Nia hatutan, kona-ba alimentasaun ba atleta sira iha kondisaun ne’ebé mak di’ak tanba hetan kontrolu husi médiku sira-ne’ebé toma konta ba ai-han.
Tuir kalendáriu ne’ebé fó sai ona, modalidade atletizmu husi nasaun hitu (7) sei kompete hahú loron 21-25 semana oin iha parte lorokraik.
Nasaun ne’ebé konfirmadu ho sira-nia atleta hodi kompete iha modalidade atletizmu mak hanesan, Portugál, Guiné-Bissau, Mosambike, São Tome e Prinsipe, Cabo Verde, Angola no Timor-Leste, enkuantu nasaun rua seluk hanesan Brazíl no Guine Equatoriál la partisipa iha jogu referidu.
Tuir orariu ne’ebé iha jogu desportivu CPLP ne’e dei hala’o abertura iha sábadu (19 Jullu) no ensera iha sábadu (26 Jullu) tinan ne’e.
Jornalista : Hortencio Sanchez
Editór : Cancio Ximenes
