PM husi nasaun pasífiku sira konfirmadu partisipa selebrasaun loron 28 Novembru
DILI, 04 Novembru 2026 (TATOLI)–Primeiru-Ministru, Kay Rala Xanana Gusmão, informa Primeiru-Ministru husi nasaun Pasífiku sira konfirmadu sei mai partisipa iha selebrasaun Loron Proklamasaun Independénsia 28 Novembru iha Timor-Leste.
“Iha 28 Novembru agora, Primeiru-Ministru husi Vanuatu, Fiji, Papua Nova Guine, Illa Salomão sei mai hamutuk ho ita hodi selebra 28 Novemvru ho ita,” Xanana Gusmão hateten ba jornalista sira hafoin enkontru semanál ho Prezidente Repúblika, José Ramos-Horta, iha Palásiu Prezidensiál Nicolau Lobato, Bairru Pite, ohin.
Xefe Governu hateten, prezensa líder sira-ne’e atu enkoraja malu no fó hanoin ba malu hodi mantein pás iha rejiaun.
“Entaun ita buka enkoraja malu, buka fó hanoin ba malu, to’o ne’ebé de’it ita nafatin moris iha pás,” nia hateten.
Iha biban hanesan, Primeiru-Ministru informa mós katak iha loron 24 fulan-Dezembru tinan ne’e, Prínsipe Mónako sei halo vizita ofisiál mai Timor-Leste.
“Prezidente Repúblika mós informa mai ha’u katak, iha loron 24 fulan-Dezembru, Prinsipe Monako sei mai iha ne’e, nia ema laran di’ak, ema fuan boot ida, ita halo preparasaun ho di’ak hodi simu ita-nia bainaka hirak ne’e,” nia dehan.
Tuir planu, Governu liuhusi Ministériu Negósiu Estranjeiru no Kooperasaun sei halo preparasaun hodi simu bainaka importante sira-ne’e.
Jornalista : Hortêncio Sanchez
Editór : Cancio Ximenes
