iklan

INTERNASIONÁL, DESPORTU, DILI, HEADLINE

Karate-do prepara atleta na’in-haat bá kompete iha jogu CPLP

Karate-do prepara atleta na’in-haat bá kompete iha jogu CPLP

Membru Karate-do hatudu atraksaun iha ambitu selebrasaun aniversáriu Unidade Polísia Espesiál (UEP-Sigla Portugés) nian ba dala 14, iha UEP Bairo Pite Dili, sesta (18/08). Imajen Tatoli/Francisco Sony

DILI, 26 fevereiru 2024 (TATOLI)– Sekretariu Jerál Federasaun Karate-do Timor-Leste (FKTL), Antonio Carlos de Araújo, informa,  prepara ona atleta na’in-haat atu kompete iha jogu Komunidade Ko’alia Lian Portugés (CPLP-sigla portugés) ne’ebé sei realiza tinan oin iha Timor-Leste.

“Ami prepara ona atleta hamutuk na’in haat, maibé iha kampionatu nasionál ne’ebé ita sei realiza iha fulan’abríl mak haree balun di’ak ita bele hili, maibé ita prepara ona atleta feto rua no mane rua,” Antonio hatete ba Agência TATOLI iha Jináziu Dili, segunda ne’e.

Nia dehan, jogu CPLP hala’o sei envolve de’it jogadór juniór iha modalidade hotu hosi nasaun membru sira.

“Kada nasaun membru sei reprezenta nasaun haat ba modalidade Karate-do nian,” katak Antonio.

Rekorda fali katak, CPLP liuhosi konferénsia Ministériu Juventude no Desportu ba dala XIV, iha Luanda, hosi nasaun hamutuk sia aprova ho votu unaminidade ba proposta Timor-Leste  nian neebé husu atu sai uma-nain ba jogu CPLP iha 2025.

Kandidatura Timor-Leste nian hodi sai uma-na’in ne’e aprezenta direta hosi Ministru Juventude, Desportu, Arte no Kultura, (MJDAK) Nélio Isaac Sarmento no hetan votu unamidade hosi nasaun membru sira hanesan Angola, Brasil, Cabo Verde, Guinne-Bissau, Guinne Equtorial, Mosambique, São Tome e Principe no Portugal.

Hafoin deklara kandidatura, Diretor Nasional Desportu MJDAK, Cesarino da Silva halo kedan aprezentasaun ba preparasaun téknika Timor-Leste nian, iha ne’ebé jogu ne’e sei iha kompetisaun ba modalidade sia mak hanesan, Atletizmu, Basketból 3×3, Voleiból Praia, Tenis Kampu, Futeból, Taekwondo, Karate-do no Xadres, inklui mós iha Atletizmu Paralímpiku.

Jogu CPLP ne’e sei implementa iha loron 17-27 Jullu tinan 2025 ne’ebé sei kompete entre nasaun CPLP hotu.

Ho nune’e, Sekretáriu Estadu Juventude no Desportu Portugal, João Paulo Correia, iha konferénsia ne’e deklara katak Portugal sei fó apoia téknika ba Timor-Leste ba jogu desportiva ne’e.

Notísia relevante: MJDAK aprova ona fundu ba Karate-do no Atletizmu realiza kampionatu nasionál

Jornalista: Hortencio Sanchez

Editór : Florencio Miranda Ximenes

iklan
iklan

Leave a Reply

iklan
error: Content is protected !!