Embaixadora Austrália Caitlin Wilson despede Prezidente Ramos-Horta
DILI, 30 Outubru 2026 (TATOLI)–Embaixadora Austrália iha Timor-Leste, Caitlin Wilson, hasoru malu no despede Prezidente Repúblika, José Ramos-Horta, iha Palásiu Prezidensiál Nicolau Lobato, hafoin konklui ninia mandatu nu’udar Embaixadora durante tinan tolu ho balun iha Timor-Leste.
“Ida-ne’e hanesan onra ida, ohin ba ha’u-nia despedida ikus ho Prezidente Repúblika Demokrátika Timor-Leste nian, iha konkluzaun ba ha’u-nia mandatu nu’udar Embaixadór Austrália nian iha Timor-Leste,” Embaixadora ne’e hateten ba jornalista sira hafoin ramata enkontru ho Xefe Estadu iha Palásiu Prezidensiál, ohin.
Iha enkontru ne’e, parte rua ko’alia kona-ba aumentu kooperasaun no elevasaun relasaun bilaterál entre Timor-Leste no Austrália durante ninia mandatu.
Embaixadora reflete katak relasaun ne’e hale’u ligasaun ema-ba-ema, parseria nivel aas entre Primeiru-Ministru na’in-rua, Governu-ba-Governu no kolaborasaun iha kampu oioin hanesan kooperasaun dezenvolvimentu, defeza, polísia no seguransa.
Nia hatutan, relasaun metin ne’e reflete nivel kooperasaun aas ho Governu Timor-Leste, inklui vizita Primeiru-Ministru Austrália nian iha Timor-Leste no asinatura akordu kooperasaun iha área barak.
“Klaru katak Austrália ho Timor-Leste hanesan viziñu ne’ebé besik tebes maibé ami mós diskute katak proximidade de’it la to’o atu harii amizade. Tenke harii konfiansa no hametin relasaun ema ho ema no komunikasaun ne’ebé di’ak,” nia dehan.
Embaixadora subliña, Austrália no Timor-Leste la’ós de’it parseiru maibé mós viziñu besik. Distánsia mesak la define belun maibé presiza sai liután hamutuk iha fatin hanesan, hodi sai belun ne’ebé metin no fundamentál ba relasaun bilaterál.
Iha biban hanesan, parte rua diskute mós programa ho impaktu aas ne’ebé fahe hamutuk, hanesan Programa Mobilidade Traballadór Pasífiku Austrália nian (Pacific Australia Labour Mobility – PALM), ne’ebé habelar ona ba Timor-Leste.
Atualmente, traballadór Timor-Leste sai nu’udar númeru daruak boot liu iha programa ne’e. Prezidente Repúblika no Embaixadora diskute dezenvolvimentu, progresu no impaktu pozitivu programa ne’e ba Timor-oan sira, iha termu abilidade, empregu no rendimentu, no mós kontribuisaun ba ekonomia no forsa traballu Austrália nian.
Embaixadora konsidera programa ne’e nu’udar manán-manán ba nasaun rua.
Enkontru despedida ne’e marka enserramentu mandatu diplomátiku ne’ebé kontribui ba hametin kooperasaun bilaterál no amizade entre povu rua.
Jornalista : Hortêncio Sanchez
Editór : Cancio Ximenes
