DILI, 29 Jullu 2025 (TATOLI)-Advogada husi JU,S Jurídiku Sosiál Konsultóriu husu ba Konsellu Superiór Ministériu Públiku (KSMP) atu suspende suspeitu ba kazu asediu seksuál ne’ebé semana liubá virál iha mídia sosiál. Maibé, husi parte Prokuradór Jerál Repúblika (PJR) dehan seidauk simu keixa.
“Ha’u seidauk hatene informasaun. Keixa mós seidauk to’o iha ha’u nia meza leten, kuandu ha’u simu ona informasaun mak ha’u foin ko’alia”, PJR, Nelson de Carvalho, ba jornalista sira iha Ministériu Justisa, tersa-ne’e.
Enkuantu advogada husi JU,S, Adelina Meluc de Jesus Lobo husu ba KSMP atu halo suspensaun ba suspeitu ne’ebé hanesan autór ba judisiáriu.
“Vítima iha prova oinoin, inklui mensajen, gravasaun lian no gravasaun vídiu ne’ebė komprova katak nia mak vítima hosi asaun asédiu seksuál no abuzu podér hosi autór judisiáriu”, nia dehan liuhusi konferénsia imprensa iha tersa-ne’e.
Solisitasaun ba suspensaun, nia dehan parte-ida atu hametin profisionalizmu husi autór judisiáriu sira.
“Kazu ida ne’e hanesan kazu ba daruak ne’ebé JU,S apoiu vítima asėdiu seksuál hosi autór judisiáriu iha fulan-neen nia laran. Ba kazu juis husi tribunál rekursu, prosesu dixiplinár paradu, no investigasaun krime sei la’o hela, maibé ho tempu kleur”, nia haktuir.
Nia hatutan tan: “Ba kazu hasoru prokuradór, keixa tama ona iha loron 2 fulan-Jullu. Ho nune’e rezulta dúvida kona-ba vontade no kapasidade hosi konsellu sira atu determina responsabilizasaun ba hahalok asédiu seksuál, komete hasi sira-nia membru”.
Nia dehan, ho kazu ne’ebé akontese ba autór judisiariu sira hanesan agora dadaun komete husi Prokuradór ida iha Ministeriu Públiku nune’e oinsá mak autór judisiáriu sira bele aplika lei, bele lori kazu abuzu seksuál ba Tribunal, bainhira sira rasik komete asėdiu seksuál ho impunidade.
Tuir nia, asėdiu seksuál problema ne’ebé akontese iha profisaun hotuhotu, dosente universidade, diretór eskola, funsionáriu publiku baibain, PNTL, F-FDTL, iha partidu polítiku laran, no sira seluk.
Advogada ne’e realsa, vítima mos konsidera kazu sivíl hodi husu indemnizasaun ba prokuradór refere, haree katak nia rasik kontaktu vítima nia família hodi bosok istória katak sira na’in-rua namora.
Situasaun ne’e, nia dehan prokuradór referidu uza keixa krime nu’udar maneira perseguisaun hasoru vítima. Entaun JU,S analiza hosi perspetiva direitu kriminál no konsulta ho vitíma, vítima deside atu halo denúnsia krime hanesan exibisionismu, pekulatu, koasaun no denúnsia kalunioza.
“Señor Prokuradór iha direitu atu defende-án hosi alegasaun dixiplinár asédiu seksuál no tuir regulamentu Ministériu Públiku nian. Vítima uza ninia direitu atu keixa prokuradór ne’e no uza ninia matenek atu halai-sees hosi situasaun asédiu seksuál”, nia konklui.
Notísia relevante: Asédiu seksuál ne’e krime públiku
Jornalista : Natalino Costa
Editora : Rita Almeida
