OEKUSI, 29 Jullu 2025 (TATOLI) – Arsebispu Arkidioseze Metropolitana Dili, Dom Virgílio Kardeál do Carmo da Silva SDB, preokupa ho projetu konstrusaun otél ne’ebé investidór estranjeiru ida konstrui okupa espasu públiku ne’ebé besik loos iha monumentu Lifau, tanba bele hafo’er fatin santo odamatan Kristianizmu nian iha Timor-Leste.
Dom Virgílio Kardeál do Carmo da Silva, observa dezenvolvimentu ne’ebé implementa iha RAEOA, ne’e importante tebes hodi hadi’a rai Oekusi no loke kampu traballu ba timoroan sira atu serbisu no mós bele loke fasilidade ba ema hodi hela iha otél nian.
“Otél ne’e, nu’udar fatin, atu ema mai hela, tanba besik aeroportu ita hotu kontente lori dezenvolvimentu mai Oekusi, no fó serbisu ba timoroan sira, maibé fatin (otél) ne’e, besik loos monumentu Lifau, ita mós preokupa uitoan, hela de’it ba otél ka iha mós atividade seluktan, ida-ne’e mak ita preokupa uitoan,” Dom Virgílio Kardeál, ko’alia iha ámbitu inaugurasaun kapela Nossa Senhora Maria Auxiliadora Postusika, segunda ne’e.
Notísia relevante:Dom Virgílio Kardeál inaugura kapela Nossa Senhora Maria Auxiliadora iha odamatan Lifau
Nia informa, atividade iha otél ne’ebé foin konstrui bele lori mós esperánsa ba povu Oekusi, tanba ema barak sei konsentra hodi halo animasaun ho talentu oioin, maibé iha atividade seluk ne’ebé mosu, sei la tuir ona fiar no kultura Oekusi-oan, liuliu liga ho vida sarani Katólika nian.
“Buat sira-ne’e mak, ita tenke presiza nafatin salva-guarda, tanba bainhira iha atividade seluk mak sei afeta ba labarik ki’ikoan sira-nia futuru,” autoridade igreja Katólika ne’e akonsella.
Lifau nu’udar fatin sagradu
Sua Eminénsia Kardeál mós rekomenda ba autoriedade RAEOA atu haree asuntu ne’e tanba projetu referidu distánsia besik ho monumentu Lifau, tanba kada tinan sarani barak partisipa iha fatin sagradu Lifau, Señor mortu no igreja mós planu sei harii Krús Kalvariu ho metru 600 iha foho prasa monumentu Lifau nian.
“Ita husu nafatin ba ba sarani sira no Autoridade RAEOA, presiza konsidera Lifau nu’udar fatin-lulik no fatin sagradu ida iha Timor-Leste, tanba semana Santa sarani barak mai vizita Oekusi hodi misa ho Señor Mortu, depois kapela Santa Reliqui Citrana, iha futuru planu atu harii krús bo’ot iha foho Lifau, entaun planu Governu hakarak proteze fatin-lulik ne’e atu foti illas sagradu hodi hasantu fatin ne’e, tanba atividade sira-ne’e hotu defende nafatin identidade Timór ba sarani ninian,” nia dehan.
Notísia relevante:http://Lifau nu’udar odamatan kristianizmu tama Timor-Leste
Entretantu, lembra katak, antes ne’e, Prezidente Autoridade RAEOA, Rogério Tiago Lobato, informa, projetu otél Lifau hahú ona konstrusaun ne’ebé sei konstrui otél ho kuartu 50, ne’ebé konstrui husi investór internasionál husi nasaun Malázia, no selebra ona kontratu arrendamentu ho Autoridade RAEOA kada fulan empreza kontribui $5000 ba kofre Estadu ho durasaun kontratu durante tinan-30.
Notísia relevante: FOTO ATUÁL: Empreza Haichuan ´harahun´ semitériu antigu 13 iha portaun bo’ot Lifau
Jornalista: Abílio Elo Nini
Editór: Rafael Ximenes de A. Belo
