DILI, 29 Jullu 2025 (TATOLI)-Ministériu Públiku (MP) liuhusi Prokuradór, Rogeiro Viegas, solisita ba tribunál atu aplika prizaun efetiva tinan-lima ba eis-Ministru Edukasaun, Bendito Freitas, relasiona ho produsaun kaderneta eskolár, iha tinan-2015. Enkuantu, advogadu arguidu husu atu absolve atuál ministru negósiu estranjeiru no kooperasaun husi kazu ne’e.
Julgamentu ne’ebé hala’o iha sesta, (25/7/2025) ho ajenda alegasaun, lee husi prokuradór subtituisaun, Domingos Goveia Leite.
Razaun imputa pena tanba konsidera arguidu Bendito Freitas ho JMGP, RHA, AFXR no AP ba krime abuzu podér, partisipasaun ekonomia no negósiu, ne’ebé tuir ministériu públika hamosu prejuizu ba Estadu.
Enkuantu arguidu na’in-neen seluk hanesan FMG, DdC, AdSP, LMdR, MM, SdS, Ministériu Públiku husu ba tribunál atu aplika pena prizaun tinan-tolu suspende ba tinan-haat, tanba konsidera provadu komete krime administrasaun danoza.
Hatán ba alegasaun ne’e, defeza husi arguidu Bendito Freitas, Pedro Camoes, husu tribunál atu absolve husi prosesu ne’e, tanba realizasaun ba produsaun kaderneta eskolár ba eskola téknika vokasionál sira hetan autorizasaun ho despasu husi Gabinete Primeiru Ministru no karta-ida husi ministériu edukasaun ba ministra finansa konaba proposta autorizasaun.
Defeza konsidera, aktu ne’ebe nia kliente halo la viola regra, tanba ne’e husu ba tribunál atu absolve husi krime ne’ebé Ministériu Públiku akuza.
Pedidu hanesan hato’o husi defeza, Manuel Amaral no José da Silva.
Manuel Amaral argumenta, tanba eskola sira utiliza hela kaderneta ne’ebé prodús, entaun konsidera la hamosu prejuizu ba Estadu.
Alende ne’e, nia dehan, bazea depoimentu husi sasin balun iha tribunál, sasin sira la entende konaba follas iha kaderneta ne’e. Tanba, follas balun fó hela espasu atu professor sira bele prenxe valór estudante sira nian.
Razaun seluk ne’ebé Defensór Públiku, Manuel Amaral, aprezenta mak Ministériu Públiku la hatudu loloos prova kona-ba kaderneta hira mak utiliza no la utliza, tanba ne’e husu tribunál atu absolve arguidu sira.
Enkuantu, defensór José da Silva, husu absolve tanba arguidu balu la partisipa iha prosesu konkursu ba produsaun kaderneta.
Hafoin rona parte hotu, tribunál marka fali ba loron 16 fulan-Setembru, tuku 9:00 hodi halo leitura akordaun ba kazu ne’e.
Notísia relevante: Tribunál fó prazu loron-10 ba antigu Ministru Edukasaun
Jornalista : Natalino Costa
Editora : Rita Almeida
