VIKEKE, 29 Jullu 2025 (TATOLI)—Ministériu Saúde (MS) servisu hamutuk ho Institutu HIV-SIDA oferese formasaun ba pesoál saúde Munisípiu Vikeke hamutuk na’in-60 kona-ba prevensaun no kombate kazu HIV-SIDA.
Iha formasaun ne’e, Diretór Nasionál Apoiu Sosiál (DNASA) husi Institutu HIV-SIDA, Silvestre da Costa Sarmento esplika formasaun ne’e oferese ba pesoál saúde sira hodi hasa’e sira-nia koñesimentu oinsá halo atendimentu ba pasiente HIV-SIDA no kombate moras HIV-SIDA iha Munisípiu Vikeke.
“Kazu HIV-SIDA Munisípiu Vikeke mós rejistadu, tanba ne’e ita oferese formasaun ba sira hodi eleva pesoál saúde sira-nia koñesimentu atende pasiente HIV-SIDA,” Silvestre da Costa Sarmento hateten iha ámbitu abertura formasun iha Salaun Beloi, Tersa ne’e.
Notísia relevante: Autoridade Viqueque husu populasaun prevene-an hosi moras HIV/SIDA
Silvestre informa katak prevensaun ba kazu HIV-SIDA sai importante ba pesoál saúde sira-ne’ebé hala’o kna’ar iha fasilidade sira hanesan postu saúde no sentru saúde sira iha Munisípiu Vikeke.
“Prevensaun ba kazu HIV-SIDA ne’e importante tebes, oinsá ita-nia maluk sira halo tratamentu iha fasilidade sira. Pesoál saúde sira tenke atende ho di’ak no akompaña sira,” nia hato’o.
Iha fatin hanesan, Reprezentante Servisu Saúde Munisípiu Vikeke, Maria Manuela Alves hateten kona-ba formasaun ne’e sai importante ba pesoál saúde sira hodi hakbiit koñesimentu ba kazu HIV-SIDA.
“Ha’u hato’o agradesimentu ba Ministériu Saúde no Institutu Kombate HIV-SIDA ne’ebé fasilita formasaun ba pesoal saúde sira iha Munisípiu Vikeke atu halo prevensaun ba kazu HIV-SIDA no kombate kazu HIV-SIDA,” nia hato’o.
Tuir dadus, kazu HIV-SIDA rejistadu iha Munisípiu Vikeke hamutuk na’in-23. Husi númeru ne’e, balun iha faze tratamentu, balun halai sees no balun mate.
Formasaun ne’e fasilita husi médiku Hospital Nacional Guido Valadares (HNGV) ba pesoál saúde sira iha Munisípiu Vikeke hamutuk na’in-60 kompostu husi saúde públika, enfermajen, médiku, parteira no pesoál apoiu HIV-SIDA no formasaun ne’e duante loron haat.
Jornalista: Vitorino Lopez da Costa
Editór: Xisto Freitas da Piedade
