DILI, 29 Jullu 2025 (TATOLI)–Vise Primeiru-Ministru (PM) Asuntu Sosiál no Ministru Dezenvolvimentu Rurál no Abitasaun Komunitária, Mariano Assanami Sabino hala’o enkontru ho liña ministeriál sira hodi diskute asuntu importante rua.
Ministériu sira ne’ebé hola parte iha enkontru ne’e mak hanesan Ministériu Juventude, Desportu, Arte no Kultura (MJDAK), Ministériu Saúde (MS), Ministériu Edukasaun (ME), Ministériu Ensinu Superiór, Siénsia no Kultura (MESSK), Ministériu Asuntu Kombatente Libertasaun Nasionál (MAKLN) no Ministériu Solidariedade Sosiál no Inkluzaun (MSSI).
“Pontu rua ne’ebé importante mak, primeiru, presiza prepara sub-misaun adezaun ba Asosiasaun Nasaun Sudeste Aziátiku (ASEAN, sigla inglés) liuliu saida mak sei falta husi ministériu neen ne’e hodi prepara iha futuru. Segundu mak haree liubá preparasaun ba Orsamentu Jerál Estadu (OJE) liuliu planu no programa lubuk ida-ne’ebé mak integradu,” Vise Primeiru-Ministru Assanami dehan ba jornalista sira iha Palásiu Governu, Tersa ne’e.
Nia akresenta pontu prinsipál ne’ebé diskutidu mós iha enkontru regulár ne’e mak preparasaun pilár dezenvolvimentu kapitál sosiál atu adere ba ASEAN liuliu asuntu legál sira-ne’ebé karik prezisa finaliza inklui kondisaun seluk ne’ebé tama iha kritériu ba adezaun.
Notísia relevante: Adezaun formál TL ba ASEAN marka ona ba 26 Outubru 2025
Tuir Assanami katak preparasaun ba dezenvolvimentu kapitál sosiál ne’e, la’ós de’it haree antes adezaun maibé depois adezaun. Ne’e importante tebes atu Timor-Leste adapta aan hodi hatudu katak Timor-Leste labele sai inferiór ka ki’ik-liu kompara ho nasaun sira membru ASEAN seluk.
“Liuliu dezenvolvimentu ospitál nune’e Timor-Leste bele simu mós pasiente husi nasaun membru ASEAN, ensinu superiór liliu hadi’a kualidade ensinu no fasilidade atubele simu mós estudante sira husi nasaun membru ASEAN. Edukasaun haree liubá kurríkulu sira-ne’ebé tuir padraun internasionál. Entaun, enkontru koordenasaun ne’e konsiderada importante tebes ba membru Governu sira hodi partisipa atubele fahe informasaun sira relasiona ho servisu ministériu ninian,” Assanami hateten.
Aleinde ne’e, nia hatutan, enkontru koordenasaun ne’e mós diskute preokupasaun deputadu sira nian iha Parlamentu Nasionál kona-ba servisu sira liga ba asuntu sosiál tanba dalaruma membru Governu sira responde ona no hala’o mós audiénsia ho deputadu sira maibé prezisa mós diskute kle’an atu fó resposta la’ós de’it ho liafuan más ho atividade sira-ne’ebé relasiona ho preokupasaun referida.
Iha diskusaun ne’e, Assanami tenik, ko’alia mós preokupasaun sosiedade ninian kona-ba problema sira iha área sosiál, nune’e membru Governu sira buka solusaun hamutuk atu nafatin fó esperansa ba komunidade.
Jornalista : Osória Marques
Editora : Julia Chatarina
