DILI, 30 Jullu 2025 (TATOLI)—Governu liuhusi reuniaun Konsellu Ministru, kuarta ne’e, halo análize ba relatóriu finál auditoria interna servisu Administrasaun Públika nian, ne’ebé hala’o husi, EY Portugál empreza auditoria no konsultoria ne’ebé integra rede internasionál Ernst & Young, programa 45 no entidades estatál 28.
Ministru Prezidénsia Konsellu Ministru, Agio Pereira, informa ohin iha loron espesiál ida tanba dezde tomada pose, Primeiru-Ministru ko’alia kedas ona kona-ba planu halo auditória, ne’ebé kompañia internasionál boot ida Ernst & Young ne’ebé nia sukursál iha Lisboa Portugál mak mai halo avaliasaun.
“Lori tempu uitoan tamba sira analiza programa de’it hamutuk 45 ho ajénsia Estadu nian 28. Uluk sira hato’o tiha ona rezultadu pre-eleminár ba Governu tomak, hafoin sira hetan buat ne’ebé kontraditóriu no hetan resposta kometáriu husi ajénsia afetada,” Ministru Agio relata ba jornalista sira iha Palásiu Governu.
Governante ne’e hatutan, iha relatóriu ne’e sira identifika frakeza ba jestaun Estadu nian ne’ebé Timor-Leste iha, maibé sira fó mós rekomendasaun balun para oinsá bele hadi’a. Entretantu, sira-nia konkluzasaun ne’ebé iha Primeiru-Ministru apela para fó akompañamentu ba prosesu atu hadi’a nian, nune’e tinan ida tan sira fila mai hodi tulun haree no analiza foun fali.
“Sira-nia rekomendasaun hirak-ne’e, ita implementa duni hodi hadi’a efikásia transparénsia jestaun Estadu nian ka lae,” nia dehan.
Ernst & Young (EY) Portugál hanesan membru husi EY Globál, ida husi organizasaun mundiál haat ne’ebé ho servisus profisionais boot liu, ho esperiénsia barak hodi realiza auditoria ba entidades públika no privada.
Bazeia ba dokumentu komunikadu imprensa, durante sorumutu ne’e, aprezenta konkluzaun no rekomendasaun prinsipál sira husi auditoria nian ne’ebé hala’o ona ba entidade administrasaun direta no indireta Estadu nian.
Identifika ona dezafiu prinsipál no área ne’ebé presiza hadi’a iha prosesu no prosedimentu. Governu simu rekomendasaun husi EY no reafirma ninia kompromisu ho transparénsia, governasaun di’ak no melloria kontinua efisiénsia iha jestaun finansa públika nian.
Prosesu auditoria ida-ne’e refleta kompromisu ida-ne’ebé Primeiru-Ministru, Kay Rala Xanana Gusmão, halo iha ninia diskursu simu pose nian, iha ne’ebé nia define ona hanesan prioridade ida husi ninia Governu atu halo auditoria ba instituisoins públikas balu, ho objetivu atu promove responsabilizasaun boot liu no rigór iha administrasaun Estadu.
Jornalista : Alexandra da Costa
Editór : Cancio Ximenes
