DILI, 30 Jullu 2025 (TATOLI) – Komisaun A iha Parlamentu Nasionál ba Asuntu Konstitusionál no Justisa iha lejislatura daneen tau prioridade atu altera Kódigu Sivíl hodi fó rekoñesimentu ba kazamentu iha relijiaun seluk.
Prezidente Komisaun A, Patrocínio dos Reis Fernandes, admite katak durante tinan barak konfisaun relijioza hanesan musulmana, indú, protestante no seluk hasoru difikuldade, tanba iha Kódigu Sívil iha artigu 1435 fó rekoñesimentu de’it ba kazamentu katóliku nian, nune’e sai dezafiu ba relijiaun seluk atu hetan sertidaun kazamentu no trata billete identidade iha notariadu.
Nia salienta maski sira mós sidadaun Timor-Leste ne’ebé presiza hetan tratamentu hanesan no labele iha diskriminasaun, tanba ne’e Komisaun tau ona prioridade durante lejislatura daneen hodi bele buka solusaun ba altera lei.
Nune’e, Komisaun tau ona prioridade no sei halo uluk audiénsia ho entidade oioin hanesan Governu, igreja Katólika, konfisaun relijioza sira seluk no entidade relevante sira hodi hodi rona hanoin ba kestaun referida.
Relembra katak Prezidente Komunidade Musulmana iha Timor-Leste, Pascoal Sidik Lemorai, antes ne’e hato’o ona pedidu ba órgaun soberania hanesan Parlamentu Nasionál no Governu atu toma atensaun ba asuntu ne’e.
Notísia relevante: PLP husu altera kódigu sívil rekoñesimentu kazamentu ba relijiaun seluk
Jornalista: Nelson de Sousa
Editora: Maria Auxiliadora
