DILI, 27 setembru 2024 (TATOLI)—Deputada PLP, Maria Angelina Sarmento, husu Governu ho Parlamentu Nasionál (PN) atu fó prioridade aprezenta inisiativa altera kódigu sívil hodi fó rekoñesimentu ba kazamentu husi konfisaun relijiaun Musulmana, Protestante, Indu ho sira seluk tan.
Notísia Relevante: Komisaun A rona preokupasaun konfisaun relijiozu kona-ba rekoñesimentu kazamentu
Nia parte simu preokupasaun barak husi maluk konfisaun relijiozu sira seluk, entaun hanoin importante ba Governu atu lori inisiativa lejislativa ruma mai atu ko’alia kona-ba direitu kazamentu husi maluk konfisaun rejiliaun sira seluk, tanba iha Timor-Leste nia lei rekoñese de’it kazamentu Igreja Katólika ho kazamentu tuir kultura nian.
“Ba maluk husi konfisaun relijiozu sira seluk, seidauk bele hetan goza direitu ida-ne’e hanesan mós ho sidadaun timoroan sira-ne’ebé ho relijiaun Katóliku, tanba ne’e hanoin komisaun A (trata asuntu Justisa no Konstituisionál) atu haree asuntu ne’e sai prioridade,” Nia hateten ba jornalista sira iha Parlamentu Nasionál, sesta ne’e.
Nia dehan, maske iha Timor-Leste iha liberdade relijiaun no fiar ne’e iha maibé entermu inisiativa lei sira atu proteje relijiaun sira seluk atu iha dokumentu hanesan ho sidadaun Katóliku sira atu bele hetan sertidaun kazamentu iha difikuldade.
Nune’e, nia hateten, tempu ona atu haree tanba tinan barak ona, maske sira minória hanesan sidadaun timoroan, maibé ita dehan labele husik ema ida kotuk iha tratamentu ida justu ba sira.
Notísia Relevante: JSMP husu PN altera kódigu sívil rekoñesimentu kazamentu ba relijiaun seluk
Jornalista : Nelson de Sousa
Editór : Cancio Ximenes
