DILI, 30 Jullu 2025 (TATOLI)—Ministru Obras Públika (MOP), Samuel Marçal, informa prosesu reabilitasaun estrada iha área urbana ne’ebé lokaliza iha Lorumata hahú husi diresaun Comite Centrál FRETILIN (CCF, sigla portugés) to’o embaixada Amérika nian iha Avedida de Portugál ne’e, iha hela faze redezeñu.
Notísia Relevante: SEATOU no MOP hahú hamamuk espasu iha Lorumata ba alargamentu estrada
Ministru Obra Públika, Samuel Marçal, hateten prosesu reabilitasaun estrada Lorumata ne’e tanba iha área urbana entaun ha’u haruka hela tékniku sira no asesór internasionál balun tuur hamutuk hodi halo redezeñu (dezeñu fila-fali), tanba ita la’ós halo estrada ne’e atu karreta de’it mak bele halo movimentu.
“Hafoin sobu tiha hotu maka ita haree fali medida atu halo estrada presiza metru hira, tanba ita halo servisu boot ida-ne’ebé integradu. Katak, ita mós presiza konstrui bee dalan (baleta), trotoar no ita presiza haree fatin tau lixeiru nian,” Ministru ne’e esplika ba jornalista iha reuniaun Konsellu Ministru, Palásiu Governu, kuarta ne’e.
Governante ne’e afirma, presiza haree atu dada bee husi neʼebé no espasu iha hodi tau kanalizasaun ba bee ka lae, neʼebé haree hotu buat sira-ne’e, entaun presiza halo nia dezeñu ne’ebé konkretu tanba projetu ne’e sei gasta osan rihun resin.
“Entaun tenke halo didi ak para povu sira bele uza estrada ne e ho konfortavél, nune’e sira-neʼebé halo movimentu uza transporte bele liu ba-mai no mós sira-ne ebé la o ain mós bele lin hotu,” nia hateten.
Tanba projetu ne’e integradu uitoan, ne’e mak presiza tempu hodi halo no la’ós halo kontrusaun ida bazeia ba ema fó presaun mak halo ne’e la’ós, entaun Governu halo servisu bazeia ba vizaun la’ós presaun.
“Ha’u lahatene ema seluk maibé ba ha’u halo servisu tuir vizaun Governu nian no politika Governu nian, tanba dalan ne’e fó espasu ba ema hotu liuliu maluk sira leba modo no ai-fuan sira-ne’e,” nia dehan.
Aleinde ne’e, nia hatutan, labele kompara fali estrada urbana ho estrada diresaun nasionál ka munisipál, ne’e labele. Estrada urbana ne’e tanba ema barak mak halo movimentu, tráfiku no engrafamentu barak ne’e tanba laiha espasu, entaun komunidade presiza kontente ho obra neʼebé Governu halo.
Enkuantu Governu mós seidauk loke konkursu públiku ba konstrusaun projetu estrada Lorumata tanba sei iha hela faze redezeñu. Bainhira remata ona mak parte aprovizionamentu foin bele loke konkursu públiku ba empreza sira hodi substitui no kompete.
Nia dehan, orsamentu ba konstrusaun Estrada ne’e mós seidauk mensiona tanba parte tékniku sira sei halo analiza no bainhira finaliza ona mak foin identifika kustu loloos.
Jornalista : Alexandra da Costa
Editór : Cancio Ximenes
