DILI, 31 Jullu 2025 (TATOLI) – Ministru Komérsiu no Indústri, Filipus Nino Pereira, informa Governu prevee rihun $300-resin ba eventu Dili International Trade Expo 2025 ne’ebé sei realiza, entre 28 Agostu no 01 Setembru tinan ne’e.
Objetivu husi espozisaun ne’e mak atu halibur empreza ki’ik no médiu, negosiante sira, organizasaun naun-governamentál sira hodi aprezenta sira-nia susesu, hatudu inovasaun sira iha kultura no teknolojia, no promove kolaborasaun entre setór oioin.
Eventu ne’e sei akumula país ualu ne’ebé konfirmadu atu partisipa mak hanesan Xina-Makau, Indonézia, Kamboja, Filipina, Índia, Brunei, Malázaia no Kanadá.
“Ita foin dahuluk organiza expo nivel internasionál iha Timor-Leste. Ita sei halo preparasaun másima oinsá asegura bainaka sira durante estadia iha Timor-Leste”, Filipus Nino Pareira hateten iha nia edifísiu Ministériu Komérsiu no Indústria, iha Bebora, ohin.
Tuir nia, prezensa emprezáriu internasionál iha expo ne’e importante ba Timor-Leste, tanba bainaka barak mai sei aprezenta sira-nia esperiénsia, ezemplu husi Kamboja sei fahe sira-nia hanoin kona-ba nasaun ne’ebé tama ikus ba ASEAN.
“Ita sei rona sira-nia esperiénsia oinsá mak bele dezevolve sira-nia an hafoin sira sai membru. Lisaun ida-ne’e importante ba ita, liuliu iha área komérsiu no indústria nian”, governante ne’e dehan.
Espozisaun ne’e sei hala’o durante loron lima no sei hetan partipasaun husi setór privadu nasionál hodi halo koneksaun ho emprezáriu sira husi rai-li’ur. Bele loke rede negósiu no haree mós oportunidade saida mak bele halo kooperasaun, nune’e bele esplora potensialidade ekonómika ne’ebé nasaun ne’e iha.
“Iha eventu ne’e sei akumula atividade hanesan semináriu, talkshow kona-ba negósiu, aprezentasaun deskobrimentu balun kona-ba inovasaun teknolojia, asina memorandu entendimentu entre emprezáriu sira, fórum negósiu entre Timor-Leste no Indonézia no Makau. Aprezenasaun ka divertimentu kulturál no Kámara Komérsiu no Indústria Timor-Leste (CCI-TL) mós aprezentasaun kona-ba apoiu empréstimu no kréditu husi BNCTL”, nia dehan.
Ministru ne’e realsa katak preparasaun ba eventu ne’e daudaun atinje ona 85%.
MKI rasik iha koordenasaun ho liña ministeriál atu asegura eventu Dili International Trade Expo 2025 ne’e bele la’o di’ak atu bainaka sira ne’ebé sei mai partisipa sente konfortavel.
Notísia relevante: Nasaun lima konfirmadu partisipa Dili International Trade Expo
Jornalista: Arminda Fonseca
Editora: Maria Auxiliadora
