VIKEKE, 31 Jullu 2025 (TATOLI)—Servisu Rejistu Notariadu Munisípiu Vikeke hahú husi fulan-Janieru to’o fulan-Jullu tinan ne’e prodús abitante sira-nia dokumentu hanesan Billete Identidade (BI) no Sertidaun Moris hamutuk 8.853.
Diretór Servisu Rejistu no Notariadu Munisípiu Vikeke, Rogério da Costa haktuir produsaun BI hamutuk 4.908 no Sertidaun Moris hamutuk 3.945.
“Kona-ba atendimentu BI no Sertidaun Moris ba ita-nia komunidade ne’ebé mai trata sira-nia dokumentu hamutuk 8.853,” Rogério da Costa ba TATOLI iha ninia kna’ar fatin, Beloi, Kinta ne’e.
Kona-ba atendimentu, Rogério dehan, funsionáriu Servisu Rejistu Notariadu fó atendimentu ne’ebé di’ak tanba kada loron komunidade mai trata sira-nia dokumentu sira-ne’e funsionáriu sira sempre esplika prosesu ho di’ak.
Notísia relevante: Blanku rejistu kriminál iha Vikeke kontinua emprimidu ho suratahan-mutin
Nune’e mós, nia dehan, Servisu Notariadu Munisípiu Vikeke prodús Sertidaun Kazamentu hamutuk 230 no sertidaun óbitu hamutuk 183, totál hamutuk 413.
Entretantu, funsionáriu servisu iha Notariadu Munisípiu Vikeke daudaun ne’e hamutuk na’in-15 mak halo atendimentu ba komunidade.
Jornalista: Vitorino Lopez da Costa
Editór: Xisto Freitas da Piedade
