DILI, 31 Jullu 2025 (TATOLI) – Bankada opozisaun FRETILIN konsidera proposta Lei Kódigu Rekuperasaun no Insolvénsia hanesan medida ho relevásnia boot ba setór privadu, liuliu ba mikro no pekena emprezasira
Joaquim dos Santos ‘Boraluli’, deputadu FRETILIN, destaka katak lei foun ne’e, reprezenta pasu importante atu garante mekanizmu apoiu ba empreza sira iha difikuldade finanseira, permite katak bele rekuepera duké taka nia atividade.
Nia dehan lei ne’e kria baze jurídika ne’ebé permite ba abnku sira oferese kréditu ho seguransa jurídika, kontribui nune’e ba sustentaibilidade setór privadu.
Proposta lei ne’e daudaun iha diskusaun faze espesialidade iha Komisaun A ba Asuntu Konstituisionál no Justisa no sei kontinua fali hafoin resesu parlamentár.
Durante diskusaun, prorposa simu opiniaun husi parte Ezekutivu no bankada Governu. Deputadu ne’e salienta lejislasaun ne’e bele reflete ba Konstituisaun, garante direitu sidadaun nian, nune’e parte opozisaun prontu kontribui ideia ba diskusaun hodi bele prodús lejislasaun referida.
“Opozisaun haree Lei Rekuperasaun no Insolvénsia ne’e importante, tanba liga sidadaun sira hala’o ninia direitu iha vida ekonomia no bele influensia Estadu nia vida. Hein katak bele konsensual to’o diskusaun finál globál”, deputadu ne’e afirma.
Relembre katak, iha 2 Juñu 2025, Parlamentu Nasionál aprova proposta Lei númeru 13/VI(2a)-Kódigu Rekuperasaun no Insolvénsia, ho votu a favór 49, kontra 0 no abstensaun rua.
Notísia relevante: Parlamentu aprova proposta lei Kódigu Rekuperasaun no Insolvénsia iha jeneralidade
Jornalista: Nelson de Sousa
Editora: Maria Auxiliadora
