MS-Ospitál Darwin asina akordu atu halo transferensia pasiente
DILI, 31 Jullu 2025 (TATOLI)—Vise Ministru Fortalesimentu Saúde, José Magno dos Reis, hateten Ministériu Saúde asina nota entendimentu (MoU) ho ospitál Darwin, ho objetivu atu halo transferensia pasiente (moras) no mós fó kapasitasaun ba rekursu umanu.
“Momentu ne’e la’os ha’u mak ba asina MoU ho ospitál Darwin Austrália, maibé Ministra Saúde ho ekipa sira mak ba asina MoU, ho intensaun katak atu halo transferensia moras no mós fó kapasitasaun ba rekursu umanu,” José Magno dos Reis dehan ba jornalista sira iha edifisiu Menzies, Bidau-Lecidere, ohin.
Nia dehan, la’ós trasferénsia moras de’it maibé sei fó kapasitasaun mós ba profisionál saúde tanba sustentabilidade atu di’ak-liu mak liuhusi MoU.
“Husi asina MoU ne’e atu fó dalan ba Governu Timor-Leste hodi halo tarsnferénsia pasiente ba nasaun sira hanesan Austrália, Singapura, Indonézia no Malázia, labele ba fatin ida de’it tenke ba fatin sira-ne’ebé mak ita asina MoU ba,” nia relata.
Nia dehan, Hospitál Darwin hanesan hospitál ne’ebé uluk Prezidente Republika hetan asidente ne’e, sira-nia ekipa iha Dili automatikamente sira halo intervensaun no evakua prezidente ba Austrália to’o fó tratamentu no agora Prezidente di’ak hela, entaun situasaun sira-ne’e Timor-Leste asina MoU.
Antes ne’e, Ministra Saúde, Elia dos Reis Amaral, ho nia ekipa dezloka ba Austrália ho objetivu atua asina akordu ho the Northern Territory, Austrália.
“Hetan ona autorizasaun husi Primeiru Ministru atu ba asina akordu entre ita ho ospitál the Northern Territory, Australia,” Elia dos Reis informa ba jornalista sira, iha Palasiu Governu.
Nia hateten, osan ne’ebe Governu aloka ba Hospitál the Northern Territory, Austrália hamutuk millaun $1 dolar australianu, atu nunne’e bele asegura no kontrola osan liga ba pasiente sira-ne’ebé halo tratamentu iha Austrália.
“Husi asina akordu ne’e ita atu halo kontrolu ba ita-nia osan ne’ebe aloka ba ita-nia pasiente hira mak ba, ita bele redús husi osan ne’ebe aloka ona anteriormente ita la kontrola orsamentu sira-ne’e iha ne’ebé,” nia dehan.
Nia esplika, agora daudaun Governu tenke halo kontrolu másimu atu nune’e bele investe ba rai ida-ne’e inklui primeiru sirkulasaun atu fó serteza ba planu Governu Konstitusionál da-sia (9) nian.
Vise Primeiru-Ministru no Ministru Koordenadór Asuntu Sosiál, Mariano Assanami Sabino, dehan tempu badak Governu Timor-Leste sei halo akordu ho Ospitál Darwin-Austrália hodi transfere pasiente sira bá halo tratamentu iha-ne’ebá.
“Iha tempu badak sei halo akordu ho Ospitál Darwin. Daudaun ne’e iha ona prosesu nia laran atu haruka pasiente sira bá,” Mariano dehan.
Jornalista : Felicidade Ximenes
Editór : Cancio Ximenes
