DILI, 01 Agostu 2025 (TATOLI)- Konsellu Kombatente Libertasaun Nasionál (CCLN, sigla portugés) kontrata empreza Bakti Timor Karya (BTK) hodi halo konstrusaun ba edifísiu Banku Veteranu ne’ebé hanaran Banco do Nosso Futuro, iha Kolmera.
“Horisehik [31 Jullu], ami asina ona kontratu ho kompañia BTK mak atu kaer [obra konstrusaun], hodi bele komesa book ona”, Prezidente CCLN, Vidal de Jesus Reak Leman, hato’o liuhusi Programa Entervista Eskluziva iha estúdiu Tatoli, Faról, ohin.
CCLN garante katak obra ne’e sei halo ho kualidade, tanba empreza ne’e iha esperiénsia ba área konstrusaun. “Ami entrega ba BTK halo, ne’ebé Konsellu iha konfiansa ba kompañia ida-ne’e”, nia garante.
Relembra katak, iha 07 Jullu 2025, Governu liuhusi Ministériu Asuntu Kombatente Libertasaun Nasionál (MACLN) no CCLN lansa fatuk dahuluk ba konstrusaun edifísiu Banku Veteranu iha Kolmera. Kustu ba konstrusaun edifísu ne’e hamutuk millaun $5.
Banco do Nosso Futuro la’ós de’it hanesan instituisaun finanseira ida, maibé hanesan símbolu ba esperansa, kontinuidade no gratidaun. Harii ho apoiu husi Fundu Investimentu ba Veteranu no lideransa Konsellu Libertasaun Nasionál sira.
Banku ida-ne’e lori mensajen kle’an ida iha nia misaun atu fó onra ba sira neʼebé lori liberdade, la ós de’it iha memória, maibé hodi fó kbiit ba sira-nia futuru, no família no komunidade nia futuru.
Banku ida-ne’e sei sai hanesan ponte finanseiru ne’ebe liga patriotizmu ho produtividade, no sakrifísiu ho sustentabilidade. Ida-ne’e sei fornese kréditu, servisu bankáriu, no oportunidade ba investimentu ne’ebé partikularmente ho objetivu atu hametin ekonomia komunidade lokál sira, liuliu iha área rurál sira ne’ebé asesu finanseiru limitadu.
Notísia relevante: https://tatoli.tl/2025/07/07/governu-lansa-fatuk-dahuluk-banku-veteranu-iha-kolmera/
Jornalista: Nelson de Sousa
Editora: Maria Auxiliadora
