DILI, 01 Agostu 2025 (TATOLI)—Ministru Juventude, Desportu, Arte no Kultura (MJDAK), Nelyo Isaac Sarmento, hateten eventu Dili Internasionál Maratona ho tema “Run for Palestine” ne’e sei lori partisipante sira espresa solidariedade no hasa’e konxíensia ba Dame no Justisa.
Notísia Relevante: Horta-MJDAK-MTA diskute kona-ba Dili Internasionál Maratona-festivál kultura Rabilau
Eventu ne’e, Prezidente Repúblika, José Ramos-Horta mak sai hanesan patronu, hodi subliña niniaa kompromisu ho unidade nasionál, saúde públika no solidariedade internasionál.
“Ami sente kontente tebes atu loke rejistu iha fulan oin ba saida mak promete ona atu sai ita-nia Maratona Internasionál Dili ne’ebé mak fó impaktu maka’as liu ikus mai,” Ministru Nelyo hateten iha konferénsia imprensa ne’ebé hala’o husi komisaun organizadora ne’ebé lidera husi Ministru Juventude, Desportu, Arte no Kultura (MJDAK), Nelyo Isaac Sarmento, ba jornalista sira iha Palásiu Prezidensiál Nicolau Lobato, Bairru Pite, sesta ne’e.
Eventu internasionál ne’e, nia dehan, hala’o tanba daudaun ne’e Timor-Leste iha hela dalan atu integra ba ASEAN.
“Ita atu uza Dili Internasionál Maratona ne’e hanesan espasu ida atu ita bele adere ba ASEAN, segundu ita hotu hatene daudaun ne’e mundu hotu sente triste konflitu iha rai barak ho nune’e mak Dili Internasionál Maratona ne’e ita bolu naran Run for Palestine ou ita koorida ba Palestina. Ida-ne’e hanesan meiu solidaridade povu Timor-Leste ba povu Palestina ne’ebé enfrenta hela sofrimentu. Ida-ne’e meiu ida atu ita hato’o ba mundu hodi promove diálogu nune’e bele haki’ak nafatin dame iha ita-nia rain,” Nelyo katak.
Iha sorin seluk, Xefe Kaza Sivíl Palásiu Prezidensiál Jesuína Maria Ferreira Gomes hateten, eventu ne’e apoiu másimu hosi Prezidente Repúblika José Ramos-Horta.
“Eventu ida-ne’e apoiu husi Prezidente Repúblika, iha tinan ida-ne’e Prezidente Repúblika prevee osan rihun $100 ba Dili Internasionál Maratona, maibé parte MJDAK sei kontribui rihun $70 ne’e hamutuk mós ho Vise-Primeiru-Ministru asuntu ekonomia,” nia tenik.
Nia hatutan, eventu ne’e sei envolve atleta timoroan sira hahú juveníl to’o senior no sei envolve mós atleta estranjeiru sira maibé permite de’it ba nasaun sira membru ASEAN mak sei bele partisipa.
Kategoria ba manán-na’in sira hahú primeiru lugar to’o désimu lugar no orsamentu ba manán-na’in sira hahú husi $8000 tun to $200, eEnkuantu ba juveníl sira sei simu tuir sira-nia nesesidade.
Tinan ida-ne’e, Governu sente orgullu atu introdús kategoria prémiu tolu ne’ebé sei kompete iha eventu ne’e:
Maratona Internasionál Dili 2025 sei iha korrida oioin ne’ebé kompreensivu hodi akomoda nivel partisipasaun hotu-hotu:
- Maratona Kompletu (Full Marathon): Kurrida ida-ne’ebé dezafiante ho distánsia 42.195 km ba korredór elite no esperiente sira.
- Meia-Maratona (Half Marathon): Korrida ida-ne’ebé populár ho distánsia 21.0975 km ne’ebé oferese teste substansiál ida ba rezisténsia.
- Eventu Para-Atleta sira (Para-Athletes Event): Kategoria dedikadu ida-ne’ebé asegura inkluzividade no selebra realizasaun sira hosi atleta sira ho defisiénsia.
- Fun Run: Korrida ida-ne’ebé badak liu, la’ós kompetisaun maibé perfeitu ba família sira, belun sira, no membru komunidade atu goza (enjoy) atmosfera festival.
Partisipante sira sei iha oportunidade únika atu halai liuhusi rota seníku sira Dili nian, hodi koko no haree kultura ne’ebé riku no tasi-ibun ne’ebé furak, enkuantu kontribui ba kauza ida-ne’ebé defende valór umanitáriu sira.
Detallu sira seluk kona-ba data rejistu loloos, detallu prémiu sira, rota sira korrida nian, no lojístika loron eventu nian sei disponibiliza iha website ofisiál Maratona Dili nian no liuhosi ami nia kanál sira iha mídia sosiál.
Kona-ba Maratona Internasionál Dili: Maratona Internasionál Dili nu’udar eventu desportivu anuál ne’ebé hala’o iha Dili, Timor-Leste, ho objetivu atu promove saúde, envolvimentu komunidade, no turizmu internasionál.
Ida-ne’e oferese kategoria korrida oioin hodi akomoda partisipante oioin no serve hanesan plataforma ida ba solidariedade nasionál no internasionál.
Rejistu ba Maratona Internasionál Dili 2025 sei loke ofisialmente iha fulan-Agostu tinan 2025. Eventu ne’ebé mark ona ba loron-sábadu, loron 11 fulan-Outubru tinan 2025, ho liña inísiu no finál ne’ebé marka ona iha fatin ikónika Palásiu Prezidensiál Nicolau Lobato, Bairru Pite, Dili.
Maratona Internasionál Dili kontinua sai simbólu unidade nasionál nian, hodi promove saúde, fitness no espíritu vibrante Timor-Leste nian iha palku globál.
Jornalista : Hortencio Sanchez
Editór : Cancio Ximenes
